Italiyaning Avstraliyadagi elchisi 57 yoshli Francheska Tardioli balkondan yiqilib tushib, vafot etdi. Bu haqda Corriere di Umbria nashri xabar berdi.
Ma’lum qilinishicha, ko‘ngilsiz hodisa 19-fevral kuni diplomat o‘zi tug‘ilib o‘sgan shahar — Folinyoda dam olayotganida sodir bo‘lgan.
Nashr ma’lumotlariga ko‘ra, Tardioli to‘rtinchi qavatning terrasasidan osilib, turganida muvozanatni yo‘qotgan. Shu bilan birga, jurnalistlar Tardioli o‘z joniga qasd qilgan bo‘lishi mumkinligini taxmin qilmoqda. La Stampa gazetasining yozishicha, elchi ruhiy siqilishdan aziyat chekib kelgan.
Kanberradagi elchixona “nazokatli inson, professional diplomat va inson huquqlari himoyachisi”ning bevaqt vafoti munosabati bilan hamdardlik bildirgan.
Ma’lumot uchun, Tardioli Kanberrada 2019-yilning sentabridan buyon elchi sifatida ishlab kelayotgandi. U ingliz va fransuz tillarida erkin gaplasha olgan, nemis va ispan tillarini yaxshi bilgan.
Eslatib o‘tamiz, 2021-yilning mayida Eronda shveysariyalik diplomat ko‘p qavatli binodan yiqilib halok bo‘lgandi.
Mavzuga doir: Ukrainaning Tailanddagi elchisi o‘lik holda topildi
Izoh (0)