Rossiyada qarovsiz, nazoratsiz qolib ketgan va yordamga muhtoj bo‘lgan bolalar tegishli mutasaddi idoralar hamkorligida O‘zbekistonga olib kelindi. Bu haqda “Yoshlar” telekanalining “Yangi Davr” informatsion dasturida xabar berildi.
Ma’lum qilinishicha, “Xorijda ota-onasi qaramog‘idan mahrum bo‘lgan O‘zbekiston fuqarolarining bolalarini O‘zbekistonga qaytarish tartibini takomillashtirish to‘g‘risida” hukumat qarori va IIVning tegishli farmoyishiga asosan ishchi guruh tuzilib, Ichki ishlar organlari, SSV, O‘zbekistonning Rossiyadagi elchixonasi xodimlari hamkorligida o‘zga yurtda qarovsiz, nazoratsiz qolib, yordamga muhtoj voyaga yetmagan bolalarni vatanga olib kelish choralari ko‘rildi.
Ishchi guruh a’zolari Rossiyaning turli shaharlarida bolalar qayerda saqlanayotgani, ularning salomatligi qay ahvolda ekanini aniqlab, kerakli hujjatlarni to‘plagan. Safar davomida qabul qilib olingan bolalarning har biri SSV xodimlari tomonidan tibbiy ko‘rikdan o‘tkazilgan va ular Toshkent—Moskva—Toshkent reysi bilan vatanga olib kelingan.
Toshkent shahar IIBB HPB katta inspektori Zafar Isroilovning aytishicha, ularning 6 nafari 3 yoshgacha bo‘lgan bolalar, qolganlari 18 yoshgacha bo‘lgan voyaga yetmaganlardir. Barchasi poytaxt IIBBga qarashli voyaga yetmaganlar markaziga olib kelingan. 3 yoshgacha bo‘lgan 6 nafar bola Yunusobod tumanidagi bolalar uyiga topshirilgan. Qolganlari o‘zlarining yashash hududi bo‘yicha viloyatlarda joylashgan voyaga yetmaganlarga ijtimoiy-huquqiy yordam ko‘rsatish markazlariga olib borilgan.
Ma’lumot uchun, Vazirlar Mahkamasining “Xorijda ota-onasi qaramog‘idan mahrum bo‘lgan O‘zbekiston fuqarolarining bolalarini O‘zbekistonga qaytarish tartibini takomillashtirish to‘g‘risida”gi qaroriga ko‘ra, xorijda ota-onasi qaramog‘idan mahrum bo‘lgan bolalar O‘zbekistonga IIV tomonidan qaytariladi. 3 yoshgacha bo‘lgan bolalarni O‘zbekistonga qaytarish SSV bilan birgalikda tashkil etiladi. Ushbu bolalarning shaxsini tasdiqlovchi hujjati bo‘lmaganda ularning O‘zbekiston fuqaroligiga mansubligi O‘zbekistonning xorijdagi diplomatik vakolatxonalari va konsullik muassasalari tomonidan tasdiqlanadi.
Izoh (0)