Россияда қаровсиз, назоратсиз қолиб кетган ва ёрдамга муҳтож бўлган болалар тегишли мутасадди идоралар ҳамкорлигида Ўзбекистонга олиб келинди. Бу ҳақда «Ёшлар» телеканалининг «Янги Давр» информацион дастурида хабар берилди.
Маълум қилинишича, «Хорижда ота-онаси қарамоғидан маҳрум бўлган Ўзбекистон фуқароларининг болаларини Ўзбекистонга қайтариш тартибини такомиллаштириш тўғрисида» ҳукумат қарори ва ИИВнинг тегишли фармойишига асосан ишчи гуруҳ тузилиб, Ички ишлар органлари, ССВ, Ўзбекистоннинг Россиядаги элчихонаси ходимлари ҳамкорлигида ўзга юртда қаровсиз, назоратсиз қолиб, ёрдамга муҳтож вояга етмаган болаларни ватанга олиб келиш чоралари кўрилди.
Ишчи гуруҳ аъзолари Россиянинг турли шаҳарларида болалар қаерда сақланаётгани, уларнинг саломатлиги қай аҳволда эканини аниқлаб, керакли ҳужжатларни тўплаган. Сафар давомида қабул қилиб олинган болаларнинг ҳар бири ССВ ходимлари томонидан тиббий кўрикдан ўтказилган ва улар Тошкент—Москва—Тошкент рейси билан ватанга олиб келинган.
Тошкент шаҳар ИИББ ҲПБ катта инспектори Зафар Исроиловнинг айтишича, уларнинг 6 нафари 3 ёшгача бўлган болалар, қолганлари 18 ёшгача бўлган вояга етмаганлардир. Барчаси пойтахт ИИББга қарашли вояга етмаганлар марказига олиб келинган. 3 ёшгача бўлган 6 нафар бола Юнусобод туманидаги болалар уйига топширилган. Қолганлари ўзларининг яшаш ҳудуди бўйича вилоятларда жойлашган вояга етмаганларга ижтимоий-ҳуқуқий ёрдам кўрсатиш марказларига олиб борилган.
Маълумот учун, Вазирлар Маҳкамасининг «Хорижда ота-онаси қарамоғидан маҳрум бўлган Ўзбекистон фуқароларининг болаларини Ўзбекистонга қайтариш тартибини такомиллаштириш тўғрисида»ги қарорига кўра, хорижда ота-онаси қарамоғидан маҳрум бўлган болалар Ўзбекистонга ИИВ томонидан қайтарилади. 3 ёшгача бўлган болаларни Ўзбекистонга қайтариш ССВ билан биргаликда ташкил этилади. Ушбу болаларнинг шахсини тасдиқловчи ҳужжати бўлмаганда уларнинг Ўзбекистон фуқаролигига мансублиги Ўзбекистоннинг хориждаги дипломатик ваколатхоналари ва консуллик муассасалари томонидан тасдиқланади.
Изоҳ (0)