O‘zbekiston bilan Saudiya Arabistoni o‘rtasida diplomatik munosabatlar o‘rnatilganiga 30 yil to‘lgani munosabat bilan 20-fevral kuni tashqi ishlar vaziri Abdulaziz Komilov hamkasbi Faysal bin Farxon al -Saudga tabrik yo‘lladi. Bu haqda Tashqi ishlar vazirligi rasmiy vakili xabar qildi.
Qayd etilishicha, maktubda O‘zbekiston—Saudiya Arabistoni munosabatlari so‘nggi yillarda ijobiy sur’at kasb etib, amaliy mazmunga ega bo‘layotgani qayd etilgan. O‘zaro aloqa va almashinuvlarning davom ettirilishi natijasida hamkorlik sifat jihatidan yangi bosqichga ko‘tarilgani ta’kidlangan.
O‘zbekiston tomoni Saudiya Arabistoni bilan barcha sohalarda o‘zaro manfaatli konstruktiv hamkorlikni davom ettirishga tayyorligi bildirgan.
Ta’kidlanishicha, 2023-yilda Butunjahon turizm tashkiloti Bosh assambleyasining 25-sessiyasini Samarqand shahrida o‘tkazish bo‘yicha O‘zbekiston tashabbusini Saudiya Arabistoni tomoni qo‘llab-quvvatlagan.
Eslatib o‘tamiz, 19-fevral kuni Abdulaziz Komilov va AQSh davlat kotibi Entoni Blinken o‘zaro tabrik almashgandi. Ular ikki davlat o‘rtasida diplomatik munosabatlar o‘rnatilganining 30 yilligi munosabati bilan o‘zaro qutlov maktublarini yo‘llagan.
Izoh (0)