Yevropa Ligasi va Konferensiyalar Ligasining 1/8 finalga o‘tish bosqichining dastlabki o‘yinlari 17-fevral kuni bo‘lib o‘tdi.
UEFA Yevropa Ligasida haftaning eng yaxshi o‘yinchisi “Portu” vakili Toni Martines bo‘ldi. Futbolchi “Latsio”ga qarshi bahsda 2 ta golga mualliflik qilgandi.
Toni bilan ushbu nomga sazovor bo‘lish uchun “Reynjers” futbolchisi Alfredo Morelos (“Borussiya D”ga qarshi o‘yinda 1 gol va 1 assist), “Atalanta” vakili Berat Jimsiti (“Olimpiakos”ga qarshi bellashuvda 2 ta gol va 93% aniq uzatma), “Betis” yarim himoyachisi Gvido Rodriges (“Zenit”ga qarshi uchrashuvda 1 gol va 84% aniq uzatma) kurash olib bordi.
Yevropa Ligasi o‘tish bosqichining javob uchrashuvlari 24-fevral kuni bo‘lib o‘tadi.
Shuningdek, Konferensiyalar Ligasida ham haftaning eng yaxshi o‘yinchisi aniqlandi. Unga ko‘ra, “Marsel” hujumchisi Arkadiush Milik ushbu e’tirofga sazovor bo‘ldi. Polshalik futbolchi “Qorabog‘”ga qarshi o‘yinda 2 ta gol urdi va 7 ta aniq zarba berdi.
Haftaning eng yaxshisi bo‘lish uchun kurashda Milikka Yuel Andersson (“Mityulland”, 1 ta gol, 67% aniq uzatma), Ugo Vetlesen (“Budyo-Glimpt”, 1 ta gol, 1 assist, 76% aniq uzatma) va Petson Daka (“Lester”, 1 gol) raqiblik qildi.
Yevropa Konferensiyalar Ligasi o‘tish bosqichining javob bahslari 24-fevral kuni bo‘lib o‘tadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)