Ferran Torres “Napoli”ga qarshi uchrashuvdan so‘ng yig‘lab yubordi. “Barselona” hujumchisi bir nechta xavfli vaziyatni ko‘kka sovurgandi (video)

“Barselona” Yevropa Ligasi 1/8 finaliga o‘tish bosqichining dastlabki o‘yinida “Napoli” bilan 1:1 hisobida durang o‘ynadi.

Kataloniyaliklar futbolchisi Ferran Torres hakam hushtagi yangraganidan keyin hissiyotlarini jilovlay olmadi va yig‘lab yubordi. Torres penaltidan unumli foydalangan bo‘lsa-da, to‘rtta golli vaziyatni yo‘qqa chiqargandi.

Jamoadoshlari va hatto “Napoli”ning bir nechta futbolchisi Ferranga dalda berdi. Torres boshi egik holda maydonni tark etdi.

Kataloniyaliklar bosh murabbiyi Xavi futbolchini qo‘llab-quvvatladi:

“Luis Suares bilan ham shunday voqea sodir bo‘lgandi. ‘Barselona’ futbolkasi bir necha kilogramm og‘irroq. Ammo Torres jamoamizda ekanligidan xursandman. U har doim gol urib kelgan va bu davom etadi.

Mashg‘ulotlarda Ferran gollar bo‘yicha yetakchilardan biri. Biz unga to‘liq ishonamiz. Murabbiylar shtabi va men bu haqida qayg‘uramiz. U juda kuchli va shu o‘rinda mas’uliyatli hamdir”.

Futbolchi yanvar oyida 45 million yevro evaziga “Manchester Siti”dan “Barselona”ga o‘tgandi. “Ko‘k-anorranglilar” safida barcha musobaqalarda 6 ta o‘yinda maydonga tushib, bitta gol muallifiga aylandi.