Yurgen Klopp nemis murabbiylari orasida Chempionlar Ligasi rekordini o‘rnatdi
“Liverpul” Chempionlar Ligasi 1/8 final dastlabki o‘yinida “Inter” ustidan 2:0 hisobida ishonchli g‘alabaga erishdi.
Mersisaydliklar bosh murabbiyi Yurgen Klopp uchun bu nufuzli musobaqadagi yubiley g‘alaba edi. Klopp Chempionlar Ligasida 50 ta g‘alabaga erishgan sakkizinchi murabbiyga aylandi. Undan tashqari, nemislar ichida ushbu natijani qayd etgan ilk mutaxassis ham bo‘ldi.
Chempionlar Ligasi o‘yinlarida eng ko‘p g‘olib bo‘lish bo‘yicha rekordchi “Manchester Yunayted” sobiq murabbiyi Aleks Fergyuson hisoblanadi. Uning hisobida 102 ta g‘alabali o‘yin mavjud. Undan keyingi o‘rinlarda Karlo Anchelotti (94), Pep Gvardiola (91), Arsen Venger (86), Joze Mourinyo (81), Lui van Gaal (57) va Rafael Benites (53) bormoqda.
Yurgen Klopp 2015-yildan buyon “Liverpul”ni boshqarib kelmoqda. 2018/19-yilgi mavsumda 54 yoshli mutaxassis qo‘l ostida jamoa Chempionlar Ligasida g‘olib bo‘lgandi. Undan tashqari 2019-yilda UEFA Superkubogi va Klublar o‘rtasidagi Jahon Chempionati sovriniga ham ega chiqqandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
