Siz “prava”ni qanday olgansiz? — “Daryo”da kichik so‘rovnoma

So’nggi vaqtlarda ijtimoiy tarmoqlarda haydovchilikka o‘qitish va guvohnoma olishdagi korrupsion holatlar, yo‘l-transport hodisalari tobora ortib borayotgani keng muhokama qilinmoqda.

Shavkat Mirziyoyev 11-fevral kuni o‘tkazilgan videoselektor yig‘ilishida O‘zbekistonda haydovchilikka o‘qitish va guvohnoma berish bo‘yicha yangi tizim yaratilishini aytdi.

“Yildan yilga avtotransport vositalari va haydovchilar soni ko‘paygani bilan ularning madaniyati, o‘zaro hurmat va bilim-tajribasi pasayib borayotgani ham ayni haqiqat. Masalan, avariyalarning 75 foizini 35 yoshgacha bo‘lganlar sodir etgan. Har yili 500 ming kishi haydovchilik guvohnomasi oladi, lekin 25 foizi mashg‘ulotlarga qatnashmaydi”, — dedi Shavkat Mirziyoyev.

“Daryo” haydovchilik guvohnomasini olish tartibi hamda tizimning qay darajada shaffofligi yuzasidan aholining fikri bilan qiziqdi.

So‘rovnomada ishtirok etgan ayolning aytishicha, so‘nggi vaqtlarda haydovchilik guvohnomasini olish ham osonlashib ketgan. O‘qimasdan sotib oladi.

“Ko‘pchilik tanishlarimdan eshitganman, borganda baribir imtihon olmaydi, guvohnoma pul bilan olinadi“, — deydi talaba yigit.

Yo‘lovchi qizning qayd etishicha, yo‘l-transport hodisalarining sababi — imtihonlarning pul bilan o‘tayotganida.

Avvalroq “Daryo” haydovchilik guvohnomasini olish tizimi va haydovchilik madaniyati haqida Abdulaziz Obidjonov bilan suhbatlashgan edi.