Nukus davlat pedagogika institutiga o‘quv binolarini qurish va ta’mirlash uchun ajratilgan pul mablag‘lari talon-toroj qilingan, deb xabar bermoqda O‘zA.
Qayd etilishicha, prezident qarori bilan 2018—2021-yillarda Nukus davlat pedagogika institutining o‘quv binolarini yangidan qurish va rekonstruksiya qilishga 54,3 milliard so‘m ajratilishi rejalashtirilgan. Mazkur qurilish va ta’mirlash ishlari uchun 2018-yilda o‘tkazilgan tenderda “Jayxun Universal Qurilish” MChJ g‘olib chiqqan.
Zarur mablag‘lar davlat budjetidan taqsimlanganiga qaramay, pudratchi korxona va buyurtmachi hisoblangan Qoraqalpog‘iston Vazirlar Kengashining Yagona buyurtmachi xizmati injiniring kompaniyasi mansabdor shaxslari o‘zaro til biriktirgan holda, tegishli hujjatlarni soxtalashtirish yo‘li bilan 12,7 milliard so‘m miqdordagi pul mablag‘larini talon-toroj qilgan.
Aniqlangan holat yuzasidan ushbu shaxslarga nisbatan Jinoyat Kodeksining 167 (o‘zlashtirish yoki rastrata yo‘li bilan talon-toroj qilish) va 209-moddalari (mansab soxtakorligi) bilan jinoyat ishi qo‘zg‘atilib, hozirda tergov harakatlari olib borilmoqda.
Boshqa holatda esa buyurtmachi Qishloq qurilish invest MChJ injiniring kompaniyasi Qoraqalpog‘iston filiali va 7 ta pudratchi tashkilotlar mansabdor shaxslari o‘zaro til biriktirib, 2020-yilda Qoraqalpog‘istonda ko‘p qavatli uy-joylar qurish uchun ajratilgan budjet mablag‘ining 17,5 milliard so‘mini talon-toroj qilgani aniqlangan.
Hozirda mazkur holat yuzasidan ham qo‘zg‘atilgan jinoyat ishi doirasida tergov harakatlari olib borilmoqda.
Mavzuga doir:
Izoh (0)