O‘zbekiston Senatining yangi binosiga fotosayohat

O‘zbekiston Senatining eski binosi Mustaqillik maydonida joylashgan — bino hatto eski namunadagi 10 ming so‘mlik kupyurada ham Senat sifatida aks ettirilgan (yangi kupyura 2021-yil avgustidan muomalaga kiritildi). 2018-yil yozida Tashqi ishlar vazirligi Xalq bankining eski (sobiq Toshkent hokimligi) binosiga ko‘chib, TIV binosiga esa Senat ko‘chib o‘tishi ma’lum bo‘lgandi.

Biroq oradan ko‘p o‘tmay Senat apparati xodimlari va senatorlar Mustaqillik maydonidagi o‘z binosiga qaytgan. Bunga sabab sifatida TIVning sobiq binosi jiddiy ta’mirga muhtojligi, u yerda Senatning “normal ishlashi va tadbirlarni o‘tkazishi uchun sharoit yo‘q”ligi ko‘rsatilgan.

2021-yil boshida ta’mirlanayotgan binoni prezident Shavkat Mirziyoyev ko‘zdan kechirdi. O‘shanda Oliy Majlis palatalarining qo‘shma majlisini o‘tkazish uchun 280 o‘rinli zal tashkil etilayotgani, u milliy naqshlar bilan bezatilib, zamonaviy texnikalar bilan jihozlanayotgani ma’lum qilingan edi. Loyihaga ko‘ra, 6 qavatli eski bino tubdan rekonstruksiya qilinib, qo‘shimcha obyektlar qurilishi reja qilinib, o‘sha paytda muhandislik tarmoqlari montaj qilinayotgan edi.

O‘sha vaqtdayoq yangi binoda delegatsiyalar bilan uchrashuvlar, matbuot anjumanlari, OAV vakillari uchun ham barcha sharoitlar yaratilishi aytilgan. Ma’lumot uchun, Prezident Shavkat Mirziyoyevning inauguratsiya marosimi ham 6-noyabr kuni aynan ushbu binoda bo‘lib o‘tgan.

“Daryo” mushtariylariga mamlakat yuqori palatasining yangi binosi qanday ko‘rinishga ega ekanini birinchilardan bo‘lib namoyish qilish uchun matbuot xizmati bilan bog‘lanib, undan fotogalereya tayyorlashga qaror qildik. So‘rovimizga qisqa muddatda ijobiy javob oldik. 16-fevral kuni ko‘zlangan manzilga yetib kelganimizda Senat matbuot xizmati vakillari bizni kutib olishdi va galereyani binoning asosiy kirish qismidan boshladik.

Ayni paytda Senatning yalpi majlislari va parlament qo‘shma majlislari uchun mo‘ljallangan asosiy zal 450 kishiga mo‘ljallangan. Ulardan 350 o‘rin senator va deputatlar hamda hukumat a’zolari, qolgan 100 o‘rin ommaviy axborot vositalari xodimlari hamda mehmonlar uchun tashkil etilgan. Parlament vakillarining 250 ish stolida ovoz berish pultlari mavjud bo‘lsa, qolgan 100 ta o‘rinda savol-javob jarayonlari uchun ishtirok pultlari bor. Zalda to‘g‘ridan to‘g‘ri kuzatuv uchun jami 9 ta kamera o‘rnatilgan bo‘lib, ular zalda so‘z olgan shaxsga avtomatik tarzda yo‘naltiriladi. Ya’ni so‘z olganlar buning uchun javob tugmasini bosishlari kifoya.

Zalda OAV vakillari uchun yaratilgan sharoitga urg‘u berar ekanmiz, hudud yetarlicha katta ekanligi sabab jonli efirlar yoki TV vakillarining stendaplari ishtirokchilarga ortiqcha noqulaylik tug‘dirmasligini ko‘rishimiz mumkin. Ya’ni hudud harakatlanish uchun qulay va keng, shunga muvofiq, zalning istalgan nuqtasidagi shovqin ish jarayoniga ta’sir etmaydi.

Zaldagi 3 ta ekranning har birining o‘lchami 21 kvadrat metr maydonga teng. Tasvir sifati o‘ta yuqori darajada tiniq.

Zalda 3 ta televizion kamera mavjud bo‘lib, ular turli tadbirlarni translyatsiya qilishda juda qo‘l keladi.

Zalning derazalariga e’tibor berilsa, ulardan quyosh nuri bemalol tushib turishini sezish qiyin emas. Prezident Shavkat Mirziyoyevning qurilish jarayoni bilan tanishish vaqtidagi “Parlamentimiz faol ishlayapti. Majlislar paytida bitta qonun loyihasi soatlab muhokama qilinadi. Shuning uchun ishtirokchilarning harakatlanishi, salomatligi, yoshi bilan bog‘liq har bir jihatni e’tiborga olish, shunga yarasha qulaylik yaratish zarur. Zalga quyosh nuri tushib tursa, kayfiyatga, ishga yaxshi ta’sir qiladi”, — degan tavsiyasi asosida shunday qulaylikka qo‘l urilgani Senat matbuot xizmati tomonidan qayd etildi.