Абгор йўллар туфайли «Файзобод» ва «Олмос» маҳалласи аҳолиси яна бир муаммога дуч келмоқда: такси ҳайдовчилари машинаси бузилишидан қўрқиб, бу кўчага киришни истамас экан.
Фото: «Дарё»
Шундай оғир шароитда яшашига қарамай, маҳалла аҳолиси қўл қовуштириб ўтиргани йўқ. Улар вақти вақти билан ҳашар ўтказиб, йўлларни чиқиндилардан тозалаб туришади, йўлларни текислашади, лекин барибир муаммони тўлиқ бартараф этишга кучлари ҳам, маблағлари ҳам етмаяпти.
Фото: «Дарё»
Маҳалла аҳолисининг бизга маълум қилишича, кўчаларда ёритиш тизимининг йўқлиги бир муаммо бўлса, ана шу қоронғи кўчаларда дайди итларнинг кўплиги дард устига чипқон.
Фото: «Дарё»
Мазкур муаммога тўла кўчалар бирйўла икки маҳалла ҳудудида жойлашгани туфайли биз «Файзобод» ва «Олмос» маҳаллалари раисларидан изоҳ олишга ҳаракат қилдик.
Биринчи бўлиб, «Файзобод» маҳалласи раиси Фазлиддин Абдуллаев ўз фикрларини билдириб ўтди.
2018 йилда маҳалламиз «Обод маҳалла» дастурига тушган. Ундан ташқари, Осиё Тараққиёт банки томонидан ҳам шу иккита маҳаллани ободонлаштириш учун 35 миллион доллар миқдорида маблағ ажратилган. Барча ишлар навбатма-навбат бажарилади. Дастлаб сув қувурлари ўтказилиб, аҳолини тоза ичимлик суви билан таъминлаш амалга оширилади. Ана ундан кейин йўллар асфальт қилиниб, ёритиш тизими ўрнатилади.
Кейин эса «Олмос» маҳалласи раиси Аҳмаджон Мирзаабдуллаев режалар билан ўртоқлашди.
Ободонлаштириш ишлари 3 та босқичда бўлади. Дастлаб зарур жойларда сув қувурлари алмаштирилади. Кейин эса канализация ўтказилади. Учинчи босқичда эса йўллар, ёритиш тизимлари яхши ҳолатга келтирилади. Фақат озгина сабр қилиш керак.
Биз Янгийўлдаги «Файзобод» ва «Олмос» маҳаллаларида олиб бориладиган ободончилик ишларини кузатиб борамиз. Ишлар якунига етганидан сўнг, яна бу ерга келиб, репортаж тайёрлаш режамизда бор.
Изоҳ (0)