“Borussiya D” futbolchi Marko Roys Germaniya chempionatining 22-turida “Union Berlin” darvozasiga ikkita gol urdi.
Yarim himoyachining uchrashuvdagi dastlabki goli “Borussiya” safidagi yubiley — 150-gol bo‘ldi. Roys Dortmundda shunchalik uzoq vaqt o‘ynadiki, jamoa hujum chizig‘ining bir necha xil variantlarini ko‘rdi. U futbolchilarning qanday porlagani-yu, yulduzga aylanib, boshqa jamoalarga o‘tganiga guvoh bo‘ldi.
Faqatgina Marko Dortmundga sodiq qoldi. Yana yettita goldan so‘ng jamoaning eng yaxshi to‘purarlari Mixael Sork va Manfred Burgsmyullerga (har birida 158 tadan gol mavjud) tenglashib oladi. “Borussiya D”da yangi to‘purar paydo bo‘lishiga shubha yo‘q.
Roys bilan birgalikda “Borussiya”ni oldinga boshlagan futbolchilar qanday qilib jamoani tark etdi? Hammasi 2013-yildan boshlangandi. O‘shanda Yurgen Klopp shogirdlari Chempionlar Ligasi yarim finalida “Real”ni 4:1 hisobida mag‘lub etib (Levandovski poker qayd etgandi), finalga yo‘l olgandi. Yozda Roysning eng yaxshi do‘sti Mario Gyotse klubni tark etdi.
Bir yildan so‘ng Robert Levandovski erkin agent sifatida jamoadan ketdi. Ikkalasining ham manzili Myunxen edi.
2014/15-yilgi mavsum so‘ngida Yurgen Klopp “Liverpul”ga yo‘l oldi. Aynan uning davrida Marko Dortmundga qaytgandi.
O‘sha davrda Mxitaryan va Obameyang porlagandi. 2016-yilning yozida Joze Mourinyoning “Manchester Yunayted”i Genrixni olib ketdi.
Genrix bilan birgalikda Mats Hummels ham klubni tark etdi. Uning ham manzili allaqachon tanish bo‘lgan Myunxen edi.
2017/18-yilgi mavsumda “Borussiya” yana ikki yulduzi bilan xayrlashdi. 2017-yilda 25-avgustda Usmon Dembele “Barselona”ga o‘tdi.
2018-yil 31-yanvarda Obameyang “Arsenal” futbolchisiga aylandi.
2018/19-yilgi mavsum ham eski ssenariy bo‘yicha davom etdi. “Chelsi” Kristian Pulishich bilan shartnoma imzoladi.
Ikki yil jarangdor transferlarsiz o‘tdi va oqibatda “Manchester Yunayted” Jeydon Sanchoni olib ketdi.
2022-yil yozida Roysni yana bir xayrlashuv kutib turibdi: Erling Holand jamoani tark etishi mumkin.
Marko Roysning “Borussiya D” bilan shartnomasi 2023-yil iyun oyida o‘z nihoyasiga yetadi. Yangi shartnoma imzolanishi kimnidir hayratga solishi dargumon.
Izoh (0)