Келиб кетадиганлар кўп, Ройс эса абадий. «Боруссия Д»нинг содиқлик рамзига айланган Марко Ройс

«Боруссия Д» футболчи Марко Ройс Германия чемпионатининг 22-турида «Унион Берлин» дарвозасига иккита гол урди.

Ярим ҳимоячининг учрашувдаги дастлабки голи «Боруссия» сафидаги юбилей — 150-гол бўлди. Ройс Дортмундда шунчалик узоқ вақт ўйнадики, жамоа ҳужум чизиғининг бир неча хил вариантларини кўрди. У футболчиларнинг қандай порлагани-ю, юлдузга айланиб, бошқа жамоаларга ўтганига гувоҳ бўлди.

Фақатгина Марко Дортмундга содиқ қолди. Яна еттита голдан сўнг жамоанинг энг яхши тўпурарлари Михаэль Сорк ва Манфред Бургсмюллерга (ҳар бирида 158 тадан гол мавжуд) тенглашиб олади. «Боруссия Д»да янги тўпурар пайдо бўлишига шубҳа йўқ.

Ройс билан биргаликда «Боруссия»ни олдинга бошлаган футболчилар қандай қилиб жамоани тарк этди? Ҳаммаси 2013 йилдан бошланганди. Ўшанда Юрген Клопп шогирдлари Чемпионлар Лигаси ярим финалида «Реал»ни 4:1 ҳисобида мағлуб этиб (Левандовски покер қайд этганди), финалга йўл олганди. Ёзда Ройснинг энг яхши дўсти Марио Гётце клубни тарк этди.

Бир йилдан сўнг Роберт Левандовски эркин агент сифатида жамоадан кетди. Иккаласининг ҳам манзили Мюнхен эди.

2014/15 йилги мавсум сўнгида Юрген Клопп «Ливерпуль»га йўл олди. Айнан унинг даврида Марко Дортмундга қайтганди.

Ўша даврда Мхитарян ва Обамеянг порлаганди. 2016 йилнинг ёзида Жозе Моуриньонинг «Манчестер Юнайтед»и Генрихни олиб кетди.

Генрих билан биргаликда Мац Ҳуммелс ҳам клубни тарк этди. Унинг ҳам манзили аллақачон таниш бўлган Мюнхен эди.

2017/18 йилги мавсумда «Боруссия» яна икки юлдузи билан хайрлашди. 2017 йилда 25 августда Усмон Дембеле «Барселона»га ўтди.

2018 йил 31 январда Обамеянг «Арсенал» футболчисига айланди.

2018/19 йилги мавсум ҳам эски сценарий бўйича давом этди. «Челси» Кристиан Пулишич билан шартнома имзолади.

Икки йил жарангдор трансферларсиз ўтди ва оқибатда «Манчестер Юнайтед» Жейдон Санчони олиб кетди.

2022 йил ёзида Ройсни яна бир хайрлашув кутиб турибди: Эрлинг Ҳоланд жамоани тарк этиши мумкин.

Марко Ройснинг «Боруссия Д» билан шартномаси 2023 йил июнь ойида ўз ниҳоясига етади. Янги шартнома имзоланиши кимнидир ҳайратга солиши даргумон.