Yunon-rum kurashchisi Sultonbek Elmurodovdan olingan doping-sinamada taqiqlangan modda aniqlandi. Bu haqida O‘zbekiston Milliy antidoping agentligi xabar beradi.
Elmurodovdan 2021-yil oktyabr oyida musobaqadan tashqari davrda olingan doping-sinamasida taqiqlangan furosemid moddasi aniqlangan.
Shu tariqa Sultonbek Butunjahon antidoping kodeksining 2.1-moddasida ko‘zda tutilgan antidoping qoidabuzarligi uchun 4 yil muddatga diskvalifikatsiya qilindi. Qaror 2021-yil 23-dekabrdan kuchga kirgan va 2025-yil 22-dekabrga qadar davom etadi.
Avvalroq dzyudo bo‘yicha Rio-2016 Olimpiya o‘yinlari sovrindori Diyorbek O‘rozboyev doping sabab 3 yilga barcha musobaqalardan chetlatilgandi. Belbog‘li kurash ustasi Mardondek Kimsanov va karate bo‘yicha Osiyo chempioni Nodira Jumaniyozova, sambochi Dilshod Choriyev va o‘zbekistonlik 7 nafar og‘ir atletikachi doping sababli 4 yilga, UFC jangchisi Liliya Shokirova esa 2 yil muddatga diskvalifikatsiya qilingani ma’lum bo‘lgandi.
Izoh (0)