Jizzax davlat pedagogika instituti bo‘lim boshlig‘i 100 ming dollar pora bilan ushlandi
Davlat xavfsizlik xizmati joylarda firibgarlik bilan bog‘liq holatlarga chek qo‘ydi. Bu haqda DXX axborot xizmati xabar qildi.
Qayd etilishicha, Jizzax davlat pedagogika institutining ta’lim sifatini nazorat qilish bo‘limi boshlig‘i 2021-yilning oktabr oyida mazkur oliy o‘quv yurti fakultetlaridan birining faoliyatini tekshirish jarayonida aniqlangan kamchiliklarni ushbu fakultet dekaniga salbiy ta’sir qilmasligi va uni lavozimida qolishini ta’minlash evaziga 100 ming AQSh dollari talab qilgan.
DXXning Sirdaryo viloyati bo‘yicha boshqarmasi xodimlarining Iqtisodiy jinoyatlarga qarshi kurashish departamenti bilan hamkorlikda o‘tkazgan tezkor tadbirda u so‘ralgan pulni vositachi orqali olgan vaqtida ushlangan.
Xorazm viloyatining Hazorasp tumanida yashovchi muqaddam sudlangan ikki fuqaro (1980-yilda tug‘ilgan) Urganch shahridagi MChJlardan birining rahbari yuk avtomashinalari xarid qilish uchun 10 milliard so‘m miqdorida kredit olmoqchi ekanligidan xabar topib, unga bu borada tanishlari orqali yordam berishini aytgan va evaziga 45 ming dollar talab qilgan.
Ular so‘ralgan puldan 15 ming dollarni avans sifatida olgan vaqtida ushlangan.
Xorazmda kuzatilgan yana bir holatda Xonqa tumani Davlat soliq inspeksiyasi xodimi ikkita MChJ faoliyatlari bo‘yicha o‘tkazilgan kameral soliq tekshiruvi natijasiga ko‘ra, budjetga qo‘shimcha hisoblangan 720 million so‘mlik soliq to‘lovlarini tanish hamkasbi imkoniyatlari orqali kamaytirib berishni va’da qilib, evaziga ushbu MChJlar rahbaridan 5 ming dollar olgan vaqtida ushlangan.
DXXning Toshkent shahar bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamentining shahar boshqarmasi bilan hamkorlikda o‘tkazilgan tezkor tadbirda esa oliy o‘quv yurtiga o‘qishga kiritib qo‘yish bilan bog‘liq noqonuniy holat qayd etilgan.
Xususan, Toshkent shahrida yashovchi fuqaro nomiga Qozog‘istonning Nursulton shahridagi Qozoq gumanitar yuridik universitetining 1-bosqichini tugatgani to‘g‘risida hujjat rasmiylashtirib, so‘ngra uni Toshkent davlat yuridik universitetining 2-kursida o‘qishga ko‘chirib berishni va’da qilgan shaxs (1996-yilda tug‘ilgan) 8 ming dollar olgan vaqtida ushlangan.
Shuningdek, qonunbuzar ushbu pul mablag‘ini Chilonzor tumanida joylashgan o‘quv markazi rahbari, muqaddam sudlangan jinoiy sherigiga (1994-yilda tug‘ilgan) berishi kerakligi ma’lum bo‘lgan va tezkor tadbir davom ettirilib, pulni olgan vaqtida u ham ushlangan.
Qashqadaryo viloyatining Qamashi tumanida yashovchi muqaddam firibgarlik bilan bog‘liq jinoyat sodir etgani uchun sudlangan fuqaro (1973-yilda tug‘ilgan) o‘zganing ishonchiga kirib, uni ichki ishlar idoralariga ishga kiritib qo‘yish evaziga 5 ming dollar olgan vaqtida ushlangan.
Sirdaryo viloyatida kuzatilgan holatda esa Guliston tumanida yashovchi, muqaddam firibgarlik bilan sudlangan shaxs (1994-yilda tug‘ilgan) mahalliy fuqaroni DXX idoralariga ishga kirishida yordam berishini aytib, undan 2,5 million so‘m olgan vaqtida ushlangan.
Aniqlanishicha, mazkur shaxs jabrlanuvchidan uni ishga kiritish uchun turli bahonalarni ro‘kach qilib, muqaddam 3900 dollar va 70 million so‘m olgan.
Hozirda mazkur holatlar yuzasidan jinoyat ishlari qo‘zg‘atilib, tergov harakatlari olib borilmoqda.
