Жиззах давлат педагогика институти бўлим бошлиғи 100 минг доллар пора билан ушланди

Давлат хавфсизлик хизмати жойларда фирибгарлик билан боғлиқ ҳолатларга чек қўйди. Бу ҳақда ДХХ ахборот хизмати хабар қилди.

Қайд этилишича, Жиззах давлат педагогика институтининг таълим сифатини назорат қилиш бўлими бошлиғи 2021 йилнинг октябрь ойида мазкур олий ўқув юрти факультетларидан бирининг фаолиятини текшириш жараёнида аниқланган камчиликларни ушбу факультет деканига салбий таъсир қилмаслиги ва уни лавозимида қолишини таъминлаш эвазига 100 минг АҚШ доллари талаб қилган.

ДХХнинг Сирдарё вилояти бўйича бошқармаси ходимларининг Иқтисодий жиноятларга қарши курашиш департаменти билан ҳамкорликда ўтказган тезкор тадбирда у сўралган пулни воситачи орқали олган вақтида ушланган.

Хоразм вилоятининг Ҳазорасп туманида яшовчи муқаддам судланган икки фуқаро (1980 йилда туғилган) Урганч шаҳридаги МЧЖлардан бирининг раҳбари юк автомашиналари харид қилиш учун 10 миллиард сўм миқдорида кредит олмоқчи эканлигидан хабар топиб, унга бу борада танишлари орқали ёрдам беришини айтган ва эвазига 45 минг доллар талаб қилган.

Улар сўралган пулдан 15 минг долларни аванс сифатида олган вақтида ушланган.

Хоразмда кузатилган яна бир ҳолатда Хонқа тумани Давлат солиқ инспекцияси ходими иккита МЧЖ фаолиятлари бўйича ўтказилган камерал солиқ текшируви натижасига кўра, бюджетга қўшимча ҳисобланган 720 миллион сўмлик солиқ тўловларини таниш ҳамкасби имкониятлари орқали камайтириб беришни ваъда қилиб, эвазига ушбу МЧЖлар раҳбаридан 5 минг доллар олган вақтида ушланган.

ДХХнинг Тошкент шаҳар бўйича бошқармаси ходимлари томонидан Иқтисодий жиноятларга қарши курашиш департаментининг шаҳар бошқармаси билан ҳамкорликда ўтказилган тезкор тадбирда эса олий ўқув юртига ўқишга киритиб қўйиш билан боғлиқ ноқонуний ҳолат қайд этилган.

Хусусан, Тошкент шаҳрида яшовчи фуқаро номига Қозоғистоннинг Нурсултон шаҳридаги Қозоқ гуманитар юридик университетининг 1-босқичини тугатгани тўғрисида ҳужжат расмийлаштириб, сўнгра уни Тошкент давлат юридик университетининг 2-курсида ўқишга кўчириб беришни ваъда қилган шахс (1996 йилда туғилган) 8 минг доллар олган вақтида ушланган.

Шунингдек, қонунбузар ушбу пул маблағини Чилонзор туманида жойлашган ўқув маркази раҳбари, муқаддам судланган жиноий шеригига (1994 йилда туғилган) бериши кераклиги маълум бўлган ва тезкор тадбир давом эттирилиб, пулни олган вақтида у ҳам ушланган.

Қашқадарё вилоятининг Қамаши туманида яшовчи муқаддам фирибгарлик билан боғлиқ жиноят содир этгани учун судланган фуқаро (1973 йилда туғилган) ўзганинг ишончига кириб, уни ички ишлар идораларига ишга киритиб қўйиш эвазига 5 минг доллар олган вақтида ушланган.

Сирдарё вилоятида кузатилган ҳолатда эса Гулистон туманида яшовчи, муқаддам фирибгарлик билан судланган шахс (1994 йилда туғилган) маҳаллий фуқарони ДХХ идораларига ишга киришида ёрдам беришини айтиб, ундан 2,5 миллион сўм олган вақтида ушланган.

Аниқланишича, мазкур шахс жабрланувчидан уни ишга киритиш учун турли баҳоналарни рўкач қилиб, муқаддам 3900 доллар ва 70 миллион сўм олган.

Ҳозирда мазкур ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.