Ўзбекистонда январь ойида уйлар сотуви камайди

2022 йил январь ойида республика бўйича 17,7 мингта кўчмас мулк олди-сотди шартномалари расмийлаштирилди. Бу ҳақда «Review.uz» хабар бермоқда.

Бу кўрсаткич 2021 йилнинг шу даврига нисбатан 2,4 фоизга камроқ. Бироқ 2020 йилнинг январь ойига нисбатан ўсиш суръати 15 фоизни ташкил этди.

Мутахассисларнинг фикрича, кўчмас мулк бозоридаги фаоллик йил бошида мунтазам равишда пасаяди. Январь ойида янги йил дам олишлари ва иш таътиллари пайтида харидорлар одатда кўчмас мулк сотиб олмайди. Баҳорга келиб, уй-жой бозоридаги фаоллик тикланади.

Ҳудудлар кесимида январь ойида кўчмас мулк сотуви бўйича энг юқори ўсиш суръатлари Қашқадарё (36,4 фоиз), Фарғона (16 фоиз), Сурхондарё (11,1 фоиз) вилоятларида кузатилди.

Тошкент (-17,6 фоиз) вилояти, Қорақалпоғистон (-14,4 фоиз) ва Тошкент шаҳрида (-6,7 фоиз) сезиларли камайиш қайд этилди.

1-расм. Кўчмас мулкни сотиб олиш ва сотиш бўйича расмийлаштирилган шартномалар сонининг ўзгариш индекси

2-расм. Тошкент ва Тошкент вилоятида кўчмас мулк олди-сотдиси бўйича тузилган шартномалар сони

Иккиламчи бозорда уй-жой нархларининг ўзгариши

Ҳисоб-китобларга кўра, январь ойида иккиламчи бозорда уй-жой ўртача нархлари ўтган ойга нисбатан 1,4 фоизга ўсди (2021 йил декабрда ўзгармаган, ноябрда 1,2 фоизга кўтарилган эди).

Уй-жой нархларда энг юқори ўсиш суръатлари Фарғона (5,2 фоиз), Андижон (5,0 фоиз) ва Навоий (4,5 фоиз) вилоятларида кузатилган бўлса, Жиззах (-4,2 фоиз), Сурхондарё (-3,1 фоиз), Наманган (-2,3 фоиз) ва Сирдарё (-2,1 фоиз) вилоятларида нархларда пасайиш қайд этилди.

Тошкент шаҳрида уй-жой нархлари 2,4 фоизга ўсди. Уй-жой нархларида энг катта ўсиш Мирзо Улуғбек (5,0 фоиз) Миробод (4,5 фоиз) ва Яшнобод (4,3 фоиз) туманларида кузатилган бўлса, Учтепа (-1,4 фоиз) ва Олмазор (0,7 фоиз) туманларида уй-жой нархлари пасайган.

Марказий банк ҳисоб-китобларига кўра, 2021 йилда тижорат банклари томонидан қарийб 59,6 минг нафар фуқарога 9,8 трлн сўм миқдорида ипотека кредитлари ажратилган. Ушбу кўрсаткич 2020 йилга нисбатан 700 млрд сўмга кўпроқ ҳисобланади.

2022 йил 1 январь ҳолатига кўра, ипотека кредитлари қолдиғи 35,8 трлн сўмга етган. Ажратилган кредитларнинг 7,35 трлн сўми бирламчи бозордаги уйларга, 2,44 трлн сўми иккиламчи бозордаги уйлар учун йўналтирилган.

Аввалроқ Ўзбекистонда уйларнинг ўртача нархи маълум қилинган эди.