Kanadada COVID-cheklovlari va bosh vazir Jastin Tryudoga qarshi keng ko‘lamli aksiya davom etmoqda. Politsiya harakatlariga qaramay, namoyishchilar AQSh bilan chegaradagi ko‘chalar va asosiy ko‘prikni to‘sib qo‘ygan (foto)
23-yanvardan buyon Kanadada koronavirus cheklovlariga qarshi keng ko‘lamli norozilik namoyishlari o‘tkazilmoqda. Aksiya ishtirokchilari bosh vazir Jastin Tryudo rahbarligidagi hukumat siyosatidan ham norozi. Namoyishlarni dastlab yuk mashina haydovchilari boshlab bergandi. Ular Kanada va AQSh chegarasini kesib o‘tishda ikki haftalik karantindan o‘tish yoki koronavirusga qarshi emlanganlik guvohnomasini ko‘rsatish kerakligini nazarda tutuvchi yangi qoidalarning bekor qilinishini talab qildi. Haydovchilar “Ozodlik karvoni” (Freedom Convoy) deb nomlangan aksiya – mamlakat poytaxti Ottavaga ommaviy yo‘l olgan mashinalar harakatini uyushtirdi. Minglab odamlar ularga qo‘shildi.
Ikki haftadirki Ottava markazida yirik namoyish bo‘lib o‘tmoqda — yuzlab yuk mashinalari va boshqa transport vositalari, shuningdek, chodirli lagerlar ko‘chalarni to‘sib qo‘ygan. 7-fevral kuni shaharda favqulodda holat joriy etildi, bosh vazir va uning oila a’zolari xavfsizlik nuqtayi nazaridan rasmiy qarorgohini tark etdi. Namoyishchilar AQSh–Kanada chegarasidagi asosiy o‘tish joyi bo‘lgan Ambassador ko‘prigini ham to‘sib qo‘ygan. Ularning ta’kidlashicha, norozilik namoyishlari yuk mashina haydovchilari uchun emlanish talabi bekor qilinib, Kanada hukumati tomonidan imtiyozlar berilgandan keyingina tugaydi.
COVID-choralari va hukumatga qarshi norozilik bildirayotgan odamlarning avtomashinalari Ottavadagi ko‘chani to‘sib qo‘ygan. Namoyishchilar soni politsiyadan ancha ko‘p. 12-fevral, 2022-yil.Foto: Getty Images
Namoyishchilar Ambassador ko‘prigi (The Ambassador Bridge) ustida harakatlanishni to‘sib qo‘ymoqda. 2286 metrlik osma ko‘prik Detroyt daryosi orqali Kanadaning Vindzor va Amerikaning Detroyt shahrini bog‘laydi. Avtomobil ishlab chiqaruvchilari ko‘prik blokadasidan aziyat chekmoqda: ushbu yo‘nalishda odatda kuniga 300 million dollarlik tovar tashiladi, ularning uchdan bir qismi avtomobil sanoatiga bog‘liq. Ontariodan Alabamagacha joylashgan zavodlardan ayrimlari yopilishga majbur bo‘ldi. 11-fevral, 2022-yil.Foto: Getty Images
Kanada bosh vaziri Jastin Tryudoning aytishicha, mamlakatdagi 120 000 yuk mashinasi haydovchilarining 90 foizi to‘liq emlangan. U namoyishchilarni “ozchilik guruh” deb atadi. Kanadaliklarning hammasi ham namoyishchilarni qo‘llab-quvvatlamadi. Suratda odamlar namoyishchilar tomonidan to‘sib qo‘yilgan Ambassador ko‘prigida ibodat qilmoqda. 11-fevral, 2022-yil.Foto: Getty Images
Politsiya xodimlari saf tortgan holda, Ambassador ko‘prigi blokadasini olib tashlashga urindi, biroq ular namoyishchilarning faqat bir qismini haydab chiqarishga muvaffaq bo‘ldi. Havo sovuqligiga qaramay, namoyishchilar soni ortgan. 13-fevral, 2022-yil.Foto: Getty Images
Ambassador ko‘prigida qonunbuzarlardan birini qo‘lga olayotgan politsiya. Namoyishlar boshlanganidan beri Kanadada tartibsizlik, o‘g‘rilik, mulkka zarar yetkazish va nafrat qo‘zg‘atish jinoyatlari bo‘yicha 60 dan ortiq jinoiy ish ochilgan. 13-fevral, 2022-yil. Foto: Getty Images
Ottava markazidagi Kanada parlamenti oldiga yig‘ilgan namoyishchilar. Mahalliy politsiya ma’lumotlariga ko‘ra, 12-fevral kuni o‘tkazilgan aksiyada to‘rt mingdan ortiq kishi ishtirok etgan. Foto: EPA
Haydovchilar aksiyasi bilan birga ularni qo‘llab-quvvatlash uchun internetda mablag‘ yig‘ish boshlandi – bir necha kun ichida haydovchilarga to‘qqiz million Kanada dollari xayriya qilindi. Yig‘ilgan mablag‘lar mehmonxona xonalari, gaz va namoyishchilarning ovqati uchun sarflanadi. Suratda norozilik namoyishi ishtirokchilari shishirilgan basseynda. Ottava, 12-fevral, 2022-yil.Foto: AFP
Qorli havoda isinishga urinayotgan namoyishchilardan biri. Ottava politsiyasi namoyishchilarga yonilg‘i, hojatxona qog‘ozi va oziq-ovqat yetkazib bergan odamlarni hibsga olishini e’lon qilgan. Shuningdek, haydovchilardan yoqilg‘i musodara qilingan. Ottava, 12-fevral, 2022-yilFoto: AFP
Izoh (0)