Polshada omikron shtammining yana ikkita yangi varianti aniqlandi. Bu haqda mamlakat sog‘liqni saqlash vaziri o‘rinbosari Valdemar Kraskaga tayanib, “RIA Novosti” xabar berdi.
“Hozirda bizda mamlakatda aniqlangan omikron shtammining ikkita yangi subvarianti mavjud”, — deydi Kraska.
Uning ta’kidlashicha, Sog‘liqni saqlash vazirligi hozircha ushbu variantlar “o‘zini qanday tutishi va kasallikni qanday kechishiga” olib kelishini bilmaydi.
“Koronavirus kundalik hayotimizdan shunchaki yo‘qolib ketmaydi. O‘ylaymanki, biz o‘rganib qolgan ma’lum bir odatlar, ma’lum qoidalar, ya’ni masofa saqlash, dezinfeksiya, niqob — bu biz bilan qolishi kerak, doimiy bo‘lmasa-da, albatta, uzoq muddatga”, — degan Kraska.
Shu bilan birga, u omikron Polshada aniqlanayotgan koronavirus holatlarning 96 foizini tashkil etayotganini ta’kidlagan.
Polshada pandemiya boshidan buyon 5,4 milliondan ortiq odamda koronavirus tasdiqlangan, 108 mingdan ortiq bemor vafot etgan.
Koronavirusning yangi omikron shtammi birinchi marta 11-noyabr kuni Janubiy Afrikada topilgan. Britaniyalik olimlarning ta’kidlashicha, yangi shtamm tarqalish tezligi tufayli avvalgilariga, jumladan, deltaga qaraganda xavfliroq bo‘lishi mumkin. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli omikronni xavfli deb tan oldi. Tashkilot, shuningdek, ilgari koronavirusni boshdan o‘tkazganlarda omikron bilan qayta kasallanish ehtimoli yuqoriligini ma’lum qildi. 2021-yilning yanvar o‘rtalarida Shvetsiya janubidagi Uppsala shahrida omikron shtammining mutatsiya aniqlangan edi.
Izoh (0)