Ukrainaning oligarx va biznesmenlari mamlakatni ommaviy ravishda tark etmoqda — “Ukrainskaya Pravda”

13-fevral kuni Kiyevdan ichida ukrainalik oligarx va biznesmenlar bo‘lgan 20 ga yaqin charter reys hamda shaxsiy samolyotlar uchib ketdi. Bu kabi holat so‘nggi olti yildan beri birinchi marta kuzatilmoqda, deb xabar beradi “Ukrainsaya pravda”.

Shu kuni Ukrainani Rinat Axmetov (Forbes versiyasi bo‘yicha eng boy ukrainaliklar orasida 1-o‘rin) va Boris Kolesnikov (55-o‘rin)ning samolyotlari Ukrainani tark etgan. Nashr ma’lumotlariga ko‘ra, aslida Axmetov mamlakatdan 30-yanvarda chiqib ketgan, hozirda Kiyevdan uning samolyotlaridan biri uchib ketgan, xolos. Kolesnikov esa Ukrainada ekani va hech qayerga ketmoqchi emasligini ma’lum qilgan.

So‘nggi haftada Ukrainani ko‘plab biznesmenlar tark etgan. 30-yanvar kuni Viktor Pinchuk (Forbes ro‘yxatida 2-o‘rin), 10-fevralda — Vadim Novinskiy (8-o‘rin) va Aleksandr Yaroslavskiy (9-o‘rin), 12-fevralda — Vasiliy Xmelniskiy (29-o‘rin) va Vadim Stolar (64-o‘rin), 13-fevral — Andrey Stavnitser (49-o‘rin) va Vadim Nesterenko (96-o‘rin) mamlakatdan chiqib ketgan.

Stavnitserning vakili biznesmen hozirda xizmat safarida ekani va tez orada qaytishini bildirgan. Xmelniskiyning matbuot xizmati safar oldindan rejalashtirilgani va u 20-fevralda qaytishini, biznesmenning farzandlari Ukrainada ekanini ma’lum qilgan.

Nashr manbalariga ko‘ra, ukrainalik tadbirkor, “Muxolifat platformasi — hayot uchun” fraksiyasi deputati Igor Abramovich 50 kishilik samolyot buyurtma qilgan. Samolyot Kiyevdan Venaga biznesmen bilan bitta partiyada bo‘lganning qarindoshlarini, shuningdek, biznes-sheriklarini olib borishi kerak.

Avvalroq AQSh davlat kotibi Entoni Blinken Rossiyaning Ukrainaga bosqini istalgan vaqtda, jumladan, Pekindagi Olimpiada o‘yinlari yakunlanguniga qadar boshlanishi mumkinligini ma’lum qilgandi. MRB va Amerika harbiylari NATOga a’zo davlatlarni Rossiya bosqinchilik harakatlarini 16-fevral kuni boshlashi mumkinligi borasidagi o‘z xavotirlari haqida ogohlantirgan. AQSh prezidentining milliy xavfsizlik bo‘yicha maslahatchisi Jeyk Sallivan esa AQSh rasmiylari Rossiya kelasi haftaning istalgan kuni Ukrainaga bostirib kirishi mumkin, deb hisoblashini, ammo hujumning aniq sanasini bilmasligini aytgan.