O‘zbekistondagi yirik sanoat korxonalaridan 2021-yilda qancha xodim ishdan bo‘shatilgani ma’lum bo‘ldi

O‘zbekistondagi yirik sanoat korxonalaridan mehnat munosabatlarida qonun buzilish holatlari yuzasidan 20 nafar xodim lavozimidan ozod etilgan, 9 nafari jinoiy javobgarlikka tortilgan. Bu haqda “O‘zkimyosanoat” AJ axborot xizmati rahbari Mastura Hayitova AOKAda o‘tkazilgan brifingda ma’lum qildi.

Ma’lum qilinishicha, mehnat munosabatlarida qonun buzilish holatlarini o‘rganish maqsadida 2021-yilda jami 49 ta xizmat surishtiruvi o‘tkazilib, natijalari bo‘yicha tegishli xulosalar tayyorlangan va aybdorlarga nisbatan tegishli choralar ko‘rilgan. Jumladan, 44 nafar xodimning ish haqidan jarima, 39 nafar mas’ul xodimlarga hayfsan, 20 nafari egallab turgan lavozimidan ozod etilgan, 11 nafariga nisbatan ma’muriy choralar ko‘rilgan, 9 nafari jinoiy javobgarlikka tortilgan.

Shuningdek, 2021-yilda tizimda jami 22 ta holatda manfaatlar to‘qnashuvi bilan bog‘liq holatlar bartaraf etilgan. Jumladan, tizimda aniqlangan noqonuniy holatlarni hujjatlashtirish natijasida kimyo sanoati korxonalari tomonidan tayyor mahsulotni saqlovga berilgan tadbirkorlik subyektlarida 80,4 milliard so‘mlik mineral o‘g‘itlar kamomadi aniqlanib, rasmiylashtirilgan. Hozirgi kunda 29,9 milliard so‘m mablag‘lar undirilishi ta’minlangan.

Shu bilan birga, olib borilgan ishlar natijasida 500 million so‘mdan ortiq tovar moddiy boyliklar va 100 million so‘mdan ortiq yoqilg‘i-moylash materiallarini talon-toroj qilinishi va 3,5 milliard so‘m xarajatlar samarasiz ishlatilishining oldi olingan.

Kimyo sanoati korxonalari tomonidan taqdim etilgan materiallar asosida huquq-tartibot organlari tomonidan 10 ta jinoiy ish qo‘zg‘atilgan.

Jamiyat va tizim korxonalari xodimlarida korrupsiyaga nisbatan murosasiz munosabatni shakllantirish, ularning huquqiy ongi va madaniyatini yuksaltirish maqsadida komplayens xizmati xodimlari va huquq-tartibot organlari xodimlari ishtirokida 2021-yilda jami 116 ta tushuntirish-profilaktik tadbirlari amalga oshirilgan.

Avvalroq O‘zbekistonda 2021-yil davomida jami 2 345 ta jinoyat ishi bo‘yicha 2 804 nafar mansabdor shaxslar jinoiy javobgarlikka tortilgani to‘g‘risida xabar berilgandi.