Ўзбекистондаги йирик саноат корхоналаридан меҳнат муносабатларида қонун бузилиш ҳолатлари юзасидан 20 нафар ходим лавозимидан озод этилган, 9 нафари жиноий жавобгарликка тортилган. Бу ҳақда «Ўзкимёсаноат» АЖ ахборот хизмати раҳбари Мастура Ҳайитова АОКАда ўтказилган брифингда маълум қилди.
Маълум қилинишича, меҳнат муносабатларида қонун бузилиш ҳолатларини ўрганиш мақсадида 2021 йилда жами 49 та хизмат суриштируви ўтказилиб, натижалари бўйича тегишли хулосалар тайёрланган ва айбдорларга нисбатан тегишли чоралар кўрилган. Жумладан, 44 нафар ходимнинг иш ҳақидан жарима, 39 нафар масъул ходимларга ҳайфсан, 20 нафари эгаллаб турган лавозимидан озод этилган, 11 нафарига нисбатан маъмурий чоралар кўрилган, 9 нафари жиноий жавобгарликка тортилган.
Шунингдек, 2021 йилда тизимда жами 22 та ҳолатда манфаатлар тўқнашуви билан боғлиқ ҳолатлар бартараф этилган. Жумладан, тизимда аниқланган ноқонуний ҳолатларни ҳужжатлаштириш натижасида кимё саноати корхоналари томонидан тайёр маҳсулотни сақловга берилган тадбиркорлик субъектларида 80,4 миллиард сўмлик минерал ўғитлар камомади аниқланиб, расмийлаштирилган. Ҳозирги кунда 29,9 миллиард сўм маблағлар ундирилиши таъминланган.
Шу билан бирга, олиб борилган ишлар натижасида 500 миллион сўмдан ортиқ товар моддий бойликлар ва 100 миллион сўмдан ортиқ ёқилғи-мойлаш материалларини талон-торож қилиниши ва 3,5 миллиард сўм харажатлар самарасиз ишлатилишининг олди олинган.
Кимё саноати корхоналари томонидан тақдим этилган материаллар асосида ҳуқуқ-тартибот органлари томонидан 10 та жиноий иш қўзғатилган.
Жамият ва тизим корхоналари ходимларида коррупцияга нисбатан муросасиз муносабатни шакллантириш, уларнинг ҳуқуқий онги ва маданиятини юксалтириш мақсадида комплаенс хизмати ходимлари ва ҳуқуқ-тартибот органлари ходимлари иштирокида 2021 йилда жами 116 та тушунтириш-профилактик тадбирлари амалга оширилган.
Аввалроқ Ўзбекистонда 2021 йил давомида жами 2 345 та жиноят иши бўйича 2 804 нафар мансабдор шахслар жиноий жавобгарликка тортилгани тўғрисида хабар берилганди.
Изоҳ (0)