Andijon viloyatining Shahrixon tumanidagi “Qorako‘rpa” mahallasida joylashgan xususiy shifoxonada gaz portlashi sodir bo‘lgani, oqibatda bir kishi vafot etgani xabar berilgandi. Voqea joyida bo‘lib turgan “Daryo” muxbirining xabar berishicha, viloyat hokimi Shuhratbek Abdurahmonov boshchiligidagi mas’ullar voqea joyini ko‘zdan kechirmoqda.
Shifoxonaga yaqin oshxonada faoliyat yurituvchi voqea guvohlaridan birining aytishicha, portlash sodir bo‘lgan paytda ular plita bosib qolgan qizga yordam bergan.
“Daryo” muxbirining aniqlashtirishicha, plita ostidan olib chiqilgan va so‘ngra vafot etgan qiz portlash oqibatida hayotdan ko‘z yumgan ikkinchi qurbon bo‘lishi mumkin.
“Bir kishi qo‘limizda jon berdi. Undan tashqari ichkarida ham bemorlar ko‘p edi. Ahvol juda yomon edi. Tez yordamga ham o‘zimiz qo‘ng‘iroq qilib, chaqirdik”, — deydi voqea guvohi.
Bosh prokuratura axborot xizmati rahbari Hayot Shamsutdinovning rasmiy Telegram kanalida ma’lumot berilishicha, Shahrixondagi portlash yuzasidan Jinoyat kodeksining 257-moddasi (mehnatni muhofaza qilish qoidalarini buzish) bilan jinoyat ishi qo‘zg‘atilgan.
Hayot Shamsutdinov ham viloyat Favqulotda vaziyatlar boshqarmasi ma’lumotini tasdiqlab, voqea oqibatida bir kishi vafot etganini bildirgan.
“Tumandagi xususiy diagnostika va davolash maskanida havo-gaz aralashmasining chaqnashi sodir bo‘lishi oqibatida 1 nafar kishi vafot etgan, 11 nafar kishi jarohatlangan”, — deyiladi Bosh prokuratura axborot xizmati rahbari bergan ma’lumotda.Avvalroq Favqulodda vaziyatlar vazirligi avvalroq hodisa oqibatida 7 kishi jabrlanganini ma’lum qilgandi.
Mavzuga doir:
- “Hammomdan chiqmoqchi bo‘lib turganimizda portlash bo‘ldi, keyin bilsam, ikki sherigim vafot etibdi”. Farg‘onadagi portlashdan jabrlanganlar voqea haqida
- “Gaz hidi chiqsa, sezardik”. Denovdagi kuchli portlash jabrlanuvchilari bilan suhbat
- Namangandagi xonadonda gaz portlashi oqibatida er-xotin va ularning 3 nafar farzandi kuyib, tan jarohati oldi
Izoh (0)