Олий Мажлис Қонунчилик палатаси соғлиқни сақлаш вазири Беҳзод Мусаевга коронавирус пандемиясига қарши курашиш тадбирлари учун ажратилган маблағларнинг оқилона сарфланиши бўйича амалга оширилган ишлар тўғрисида маълумот бериши учун параламент сўровини юборди. Бу ҳақда палата матбуот хизмати хабар берди.
Маълумотларга кўра, 2021 йилда коронавирус пандемиясига қарши курашиш ва вакцина сотиб олиш харажатлари учун дастлаб 3 триллион сўм, 2021 йил 5 ноябрда қабул қилинган «2021 йил учун Ўзбекистон Республикасининг ‘Давлат бюджети тўғрисида’ги қонунига ўзгартишлар киритиш ҳақида»ги қонун билан қўшимча равишда 1,2 триллион сўм, жами 4,2 триллион сўм маблағ ажратилган.
Шунингдек, коронавирусга қарши курашиш тадбирларига жалб қилинган тиббиёт ходимларини ва бошқа касбдаги ходимларни рағбатлантириш харажатларига 1,4 триллион сўм, дори-дармон воситалари, гигиена ва зарарсизлантирувчи воситалар учун 604,2 миллиард сўм, бир маротабалик шахсий ҳимоя учун комбинезонлар, қўл ва юз ниқоблари ҳамда бошқа харажатлар учун 89,5 миллиард сўм, озиқ-овқат маҳсулотларига 86,6 миллиард сўм ажратилган.
Лаборатория реагентлари, пирометрлар, тест тизимлари ва бошқа харажатларга 113,9 миллиард сўм, вакцина сотиб олиш учун 1,32 триллион сўм, эмлаш пунктларини ташкил этишга 9,8 миллиард сўм, Тошкент шаҳрида ва Наманган вилоятида коронавирусга қарши курашиш бўйича тиббиёт марказларини ташкил этиш харажатларига 270,6 миллиард сўм ва бошқа харажатлар учун 174,5 миллиард сўм ажратилган.
Аммо Олий Мажлис Қонунчилик палатасига Соғлиқни сақлаш вазирлиги томонидан 2021 йилнинг биринчи ярим йиллигидаги фаолият тўғрисида тақдим этилган ахборотда, шунингдек, Вазирлар Маҳкамаси томонидан давлат бюджети ижросининг бориши юзасидан тақдим этилган ҳисоботларда, Молия вазирлиги тақдим этган ахборот ва материалларда коронавирус пандемиясига қарши курашиш ҳамда вакцина сотиб олиш харажатлари учун ажратилган маблағларнинг ишлатилишига доир маълумотлар ўз аксини топмаган.
Шунингдек, Қонунчилик палатаси Бюджет ва иқтисодий ислоҳотлар қўмитасининг сўрови бўйича ҳам Соғлиқни сақлаш вазирлиги томонидан зарур маълумотлар тақдим этилмаган.
Юқоридагилардан келиб чиқиб, мажлисда Соғлиқни сақлаш вазири Беҳзод Мусаевга «2021 йил учун Ўзбекистон Республикаси Давлат бюджетидан коронавирус пандемиясига қарши курашиш тадбирлари учун ажратилган маблағларнинг оқилона сарфланиши бўйича амалга оширилган ишлар тўғрисида» Қонунчилик палатасининг парламент сўровини юбориш ҳақида қарор қабул қилинган.
2021 йилнинг ноябрида Ўзбекистон президентининг тегишли фармони билан бош вазир ўринбосари лавозимида ишлаб келган Беҳзод Мусаев соғлиқни сақлаш вазири этиб тайинланганди. Аввалроқ президент Шавкат Мирзиёев йиғилишда соғлиқни сақлаш тизими ҳақида гапирар экан, вазир Беҳзод Мусаевга, энг аввало, пастга тушиб ишлаш кераклигини таъкидлаган эди. «Энди сен ҳам буни эплолмасанг, Ўзбекистонда тиббиётни ҳеч ким эплолмайди, ёпиш керак вазирликни», — деганди давлат раҳбари Беҳзод Мусаевга қарата.
Изоҳ (0)