Тошкент шаҳар Беруний–Фаробий кўчалари чорраҳасида жойлашган 6 та радар ва камера ўрнатиш жойлари кимошди савдосида сотилди.
Радар ва камера ўрнатиш жойлари Тошкент шаҳар Мирзо Улуғбек тумани ИИВ томонидан аукционга қўйилган эди.
Аукцион 8 февраль куни бўлиб ўтган. Бошланғич нархи 6,75 млн сўм бўлган кимошди савдоси қарийб 30 дақиқа давом этди. «Microyol» МЧЖ 1,31 млрд сўм таклиф қилиб ғолиб бўлди.
Кимошди савдоси ғолибига бир нечта мажбуриятлар юклатилган. Йўл ҳаракати қоидалари нотоғри аниқланган ҳолатлар тасдиқланадиган бўлса, бунда уларни содир этган деб эътироф этилган шахсга етказилган барча моддий зарар қопланиши керак.
Аукцион орқали радар
Тадбиркорларга жорий йилнинг 1 мартидан бошлаб йўлларга камералар ва радарлар ўрнатишга рухсат берилган. Ер участкалари онлайн аукционлар орқали тақдим этилади.
Аукцион ғолиблари участкаларни бошқа тадбиркорларга ўтказиш ҳуқуқи билан чекланмаган муддатга олади. 2021—2022 йилларда шу тарзда 3356 та видеокамера ва 763 та радар ўрнатиш режалаштирилган.
Бундай лотлар катта талабга эга. Аукцион пайтида нархлар ўн марталаб ошиши мумкин. Масалан, июль ойида Хоразмдаги битта ҳудуд 40 млн сўмга ёки бошланғич баҳосидан 27 баравар қимматга сотиб олинган.
Маълумот учун, 2021 йил июнь ойидан бошлаб Ўзбекистондаги чорраҳа ва йўлларда радар ва камералар қўйиш жойлари аукцион орқали савдога қўйилиши бошланди. 1 июль куни E-auksion сайтида биринчи бор Тошкент шаҳрида радар ўрнатиладиган жойлар аукционга чиқарилди.
Аввалроқ Ўзбекистонда декабрь ойида ўрнатилган фоторадарлар тўғрисида маълумот берилганди. Унга кўра, ўтган бир ой ичида Қорақалпоғистонда 2 та, Қашқадарё вилоятида 5 та, Бухоро вилоятида 8 та, Тошкент шаҳрида 11 та стационар, шунингдек, Самарқанд вилоятида 25 та, Фарғона вилоятида эса 4 та ЙҲҚ радарлари ўрнатилган.
Изоҳ (0)