Xorazm viloyati Yangibozor tumani aholi bandligiga ko‘maklashish markazi sobiq direktori M.J. 5 yilga qamaldi. Bu haqda viloyat sudi jamoatchilik va OAV bilan aloqalar bo‘limiga tayanib “Gazeta.uz” xabar qildi.
Ta’kidlanishicha, unga nisbatan Jinoyat kodeksining 210-moddasi (pora olish) 2-qismi “v” bandi bilan qo‘zg‘atilgan ish Jinoyat ishlari bo‘yicha Yangibozor tuman sudida ko‘rib chiqilgan.
Sud hujjatlariga muvofiq, Urganch tumanida (1973-yilda) tug‘ilgan M.J. xizmat vazifasi davomida Bandlik va mehnat munosabatlari vazirining buyrug‘i bilan tasdiqlangan nizomga asosan aholi bandligiga ko‘maklashish markazlariga subsidiya ajratish vakolati berilganidan foydalangan.
2021-yil 19-fevral kuni “Ro‘zmat bozor bobo” ishlab chiqarish kooperativi rahbari E.R. markazga 67 nafar kooperativ a’zosiga subsidiya ajratib berishni so‘rab markazga murojaat qilgan.
“Mansabdor uni pora berishga majbur etadigan sharoitga qasddan tushirib, Bandlikka ko‘maklashish davlat jamg‘armasi mablag‘lari hisobidan jami 122 million 496 ming 100 so‘mlik subsidiya ajratilishi evaziga undan 1000 dollar miqdorida pora talab qilgan”, — deyiladi xabarda.
Kooperativ rahbari E.R. markazi direktoriga buncha puli yo‘qligini bildirgan. Shundan so‘ng, M.J. subsidiya ajratilgach E.R. dan mazkur pullardan bank orqali 10 million so‘mni naqdlashtirib olib kelish talabini qo‘ygan.
Sud ma’lumotiga ko‘ra, 2021-yil 15-iyun kuni soat, taxminan, 11:30 larda markaz rahbari o‘zining xizmat xonasida E.R. dan 10 million so‘m pul mablag‘ini pora tariqasida olgan vaqtida huquqni muhofaza qiluvchi organ xodimlari tomonidan ushlangan.
Sudlanuvchi M.J. Jinoyat kodeksining 210-moddasi 2-qismi “v” bandi bilan aybli deb topilib, 5 yil muddatga ozodlikdan mahrum qilish jazosi tayinlangan. Shuningdek, Jinoyat kodeksining 45-moddasi qo‘llanib, u 2 yil muddatga davlat va davlat ishtirokidagi korxona, muassasa va tashkilotlarda mansabdorlik va moddiy javobgarlik lavozimlarida ishlash huquqidan ham mahrum etilgan.
Izoh (0)