Qashqadaryo viloyatidagi chigit mojarosi yuzasidan Monopoliyaga qarshi kurashish qo‘mitasi 5-yanvar kuni munosabat bildirilgandi. Rasmiy munosabatda holat o‘rganilishi va o‘rganish natijalari yuzasidan qo‘shimcha ma’lumot berilishi ko‘rsatib o‘tilgan. 2022-yil 3-fevral kuni qo‘zg‘atilgan ish yakuni bo‘yicha munosabat e’lon qilindi. Qo‘mita ijtimoiy tarmoqlarda bu borada e’tiroz va fikrlar tarqalgani sabab qo‘shimcha ma’lumotlar bilan bo‘lishdi.
Ma’lum qilinishicha, Monopoliyaga qarshi kurashish qo‘mitasiga 2021-yil 23-dekabr kuni Samarqand viloyatida faoliyat yuritayotgan Pet agro oil hamda Oil extraction MChJlarning murojaatlari kelib tushgan.
Mazkur murojaatlarda Pet agro oil tomonidan tegishli tartibda birja savdolari orqali Qashqadaryo viloyatida joylashgan “Koson baxt tekstil” MChJdan paxta chigiti sotib olgani, biroq ushbu chigitni Qashqadaryo viloyatidan olib chiqib ketishda viloyat hokimining topshirig‘i bilan viloyatning “Umakay” muntazam YPX maskanida hech qanday asoslovchi hujjatlarsiz viloyat Ichki ishlar boshqarmasi YHXB xodimlari tomonidan ushlab turish kabi taqiqlar mavjudligi bildirilib, ushbu masalada amaliy yordam berilishi so‘ralgan.
Ushbu holat yuzasidan qo‘mita tomonidan viloyatning tegishli tashkilotlari bilan birgalikda dastlabki o‘rganishlar o‘tkazilgan. O‘rganish jarayonida Qashqadaryo viloyati hokimligi hamda Qashqadaryo viloyati Ichki ishlar boshqarmasi tomonidan “Raqobat to‘g‘risida”gi qonunning 12-moddasi talablari buzilgan deb topilib, ularga nisbatan 2022-yil 6-yanvar kuni ish qo‘zg‘atilgan.
Qo‘zg‘atilgan ish jarayonida Qashqadaryo viloyati hokimligi, viloyat Ichki ishlar boshqarmasi mas’ullari va qo‘mita xodimlari bir necha marotaba onlayn uchrashuvlar o‘tkazib, surishtiruv ishlari olib borgan.
Yuqoridagilarga asosan Qashqadaryo viloyati hokimligiga hamda viloyat Ichki ishlar boshqarmasiga qonunbuzilish holatlari bo‘lgani, tadbirkorlik subyektlarining chigit mahsulotlarini Qashqadaryo viloyatidan olib chiqib ketishiga to‘sqinlik qilmaslik hamda ushbu qonunbuzilish holatlariga kelgusida yo‘l qo‘ymaslik choralarini ko‘rish bo‘yicha 2022-yil 12-yanvar kuni 11/2-sonli ish qo‘mita ko‘rsatmasi berilgan.
Shundan so‘ng yuqorida ko‘rsatilgan tadbirkorlar tomonidan 20-yanvar kuni o‘zlariga tegishli bo‘lgan chigit mahsulotlarini Qashqadaryo viloyati hududidan olib chiqib ketgan. Tadbirkorlar tomonidan qo‘mitaga e’tiroz yo‘qligi, ular o‘z mahsulotlarini aynan qo‘mitaning aralashuvidan so‘ng olib chiqib ketilgani haqida ma’lum qilgan.
Iqtisodchi Otabek Bakirovning Telegram kanalida e’lon qilgan postidagi MChJlar qo‘mitaga murojaat qilmagan. Shuningdek, Oliy Majlis Qonunchilik palatasi deputati Rasul Kusherbayev o‘zining Telegram kanalida “Taqiq qo‘yganlar iqtisodiyotga va tadbirkorlarga yetkazgan zarari uchun qanday jazolandi? Chunki bu orada chigit yangi mahsulotga aylanib, allaqachon savdo rastalarida turgan bo‘lardi. Qo‘mita buni ham ohirigacha olib borishi kerak. Zero qonun ustuvor-jazo muqarrar”, deya ta’kidlab o‘tgan.
Monopoliyaga qarshi kurashish qo‘mitasining ma’lum qilishicha, holat bo‘yicha “Raqobat to‘g‘risida”gi qonun talablari buzilgan yoki buzilmagani aniqlanib, ish qo‘zg‘atiladi va qonun buzilishiga yo‘l qo‘yganlarga nisbatan (Qashqadaryo viloyati hokimligi va Qashqadaryo viloyati IIB ga) ko‘rsatma xati yuboriladi (qo‘mita jazoga tortish, jarima qo‘llash yoki boshqa javobgarlik belgilash vakolatiga ega emas).
“Agar davlat boshqaruvi organlari, mahalliy davlat hokimiyati organlari va ular mansabdor shaxslarining raqobat to‘g‘risidagi qonunchilikni buzuvchi harakati (harakatsizligi) tufayli xo‘jalik yurituvchi subyektga yoxud boshqa shaxsga zarar yetkazilgan bo‘lsa, u holda mazkur zararning o‘rnini qoplash yuzasidan qonunchilikda belgilangan tartibda tadbirkor sudga murojaat etishi mumkin”, — deyiladi munosabatda.
Eslatib o‘tamiz, 2020-yilda ham 3 ta viloyatda bu kabi holat kuzatilgan. Qo‘mita tomonidan 2020-yil 27-noyabrda “Raqobat to‘g‘risida”gi qonunining 12-moddasi talablari buzilganligi holati yuzasidan Vazirlar Mahkamasining 2005-yil 12-oktabrdagi 225-sonli qaroriga muvofiq Qashqadaryo, Xorazm va Surxondaryo viloyat hokimliklariga hamda ushbu viloyatlarning IIBlariga nisbatan Qo‘mita tomonidan 2020-yil 27-noyabrda ish qo‘zg‘atilgan edi. Qonunchilik talablari buzilgani o‘z tasdig‘ini topgani sababli hokimliklarga va viloyatlarning IIBlariga nisbatan qo‘mitaning qarori qabul qilingan va ko‘rsatmasi berilgan edi.
Izoh (0)