Адлия вазири Русланбек Давлетов TikTok платформасини блоклаш бўйича билдирилган таклифлар ҳақида гапириб, у ахборотнинг эркин тарқалиши тарафдори эканини таъкидлади. Бу ҳақда вазир жамоатчиликка берган анъанавий йиллик ҳисоботи давомида айтиб ўтди, деб хабар беради «Дарё» мухбири.
«Мен ахборотнинг эркин тарқалиши тарафдориман. Тарихда ҳам ахборотни чеклаш кўп бўлган. Блоклаш нима дегани ўзи. Техник нуқтаи назарда бунинг имкони борми? Блокладик, дейлик, ҳамма VPN’га ўтади-ку. Биласизми, ҳар куни қанча янги дастурлар чиқади. Биз жаҳолатга қарши маърифат билан курашимиз керак. TikTok’дан бошқа ёмон контент йўқми? Блоклаш техник жиҳатдан қийин масала. Ўйлайманки, бу ҳеч қандай самара бермайди» — дейди адлия вазири Русланбек Давлетов.
Эслатиб ўтамиз, 2021 йил июль ойида Ўзбекистонда TikTok ва Twitter’нинг очилиши секинлашди. 2 июль куни эса Ўзбекистонда айрим ижтимоий тармоқлар, хусусан, TikTok’дан фойдаланиш расман чекланди.
Кейинчалик «Миллий тикланиш» демократик партияси Марказий кенгаши раиси ўринбосари Феруза Муҳаммаджонова TikTok ижтимоий тармоғини бутунлай блоклашни таклиф қилди.
Тошкент шаҳар ҳокими «Тошкент ёшлар форуми — 2020» доирасида бўлиб ўтган матбуот анжуманида «тиктокерларга тақиқ қўйиш эмас, уларни тўғри йўлга йўналтириш бўйича иш олиб боришимиз кераклиги» ҳақида айтган эди.
«TikTok бир платформа, у ерда турли контент бор. Ҳамма ўзига керакли контент олади. Минг афсуски, тақиқ қўйилган одамлар керакмас контентларга киргани кўриниб турибди. Агар керакли контентларга кирилса, ҳеч қандай платформанинг зарари йўқ, деб ўйлайман. Менинг фикримча, тағин билмадим», — деган эди ҳоким «Тошкент ёшлар форуми – 2021» доирасида бўлиб ўтган матбуот анжуманида.
2022 йилнинг февраль бошларида эса «Адолат» социал-демократик партияси фаоллари Ўзбекистонда TikTok ижтимоий тармоғини бутунлай блоклаш таклифини илгари сурди.
Изоҳ (0)