Turkiya prezidenti Rajab Toyyib Erdo‘g‘onning koronavirusga topshirgan testi musbat chiqdi. Bu haqda uning o‘zi Telegram kanalida ma’lum qildi.
“Bugun rafiqam va o‘zimda sezilgan yengil simptomlardan keyin topshirgan COVID-19 testimiz natijasi musbat chiqdi”, — deb yozgan Turkiya prezidenti.
Erdo‘g‘onning so‘zlariga ko‘ra, unga omikron tashxisi qo‘yilgan, kasallik yengil kechmoqda. “Ishni uydan davom ettiramiz. Duolaringizga mushtoqmiz”, — deya qo‘shimcha qilgan davlat rahbari.
3-fevral, payshanba kuni Erdo‘g‘on Ukrainaga tashrif buyurgandi. Uning tashrifi mamlakatlar o‘rtasida diplomatik munosabatlar o‘rnatilganining 30 yilligiga to‘g‘ri keldi. Kiyevda u Ukraina prezidenti Vladimir Zelenskiy bilan uchrashdi. Davlat rahbarlari, jumladan, mudofaa sohasida kelishuv va memorandumlarni imzoladi, shuningdek, Ukraina sharqidagi mojaroni muhokama qildi.
Turkiyada so‘nggi 24 soat ichida koronavirusga chalinish bo‘yicha 107 mingdan ortiq yangi holat aniqlandi. Bu pandemiya boshidan beri rekord ko‘rsatkich. Mamlakatda jami 12 051 852 kishi koronavirus bilan kasallangan, 88 312 kishi infeksiya oqibatida vafot etgan.
2021-yilning yanvar oyida Erdo‘g‘on koronavirusga qarshi emlangani, unga Xitoyning Sinovac kompaniyasiga tegishli CoronaVac preparati yuborilgani haqida xabar qilgandi.
Izoh (0)