Туркия президенти Ражаб Тоййиб Эрдўғоннинг коронавирусга топширган тести мусбат чиқди. Бу ҳақда унинг ўзи Telegram каналида маълум қилди.
«Бугун рафиқам ва ўзимда сезилган енгил симптомлардан кейин топширган COVID-19 тестимиз натижаси мусбат чиқди», — деб ёзган Туркия президенти.
Эрдўғоннинг сўзларига кўра, унга омикрон ташхиси қўйилган, касаллик енгил кечмоқда. «Ишни уйдан давом эттирамиз. Дуоларингизга муштоқмиз», — дея қўшимча қилган давлат раҳбари.
3 февраль, пайшанба куни Эрдўғон Украинага ташриф буюрганди. Унинг ташрифи мамлакатлар ўртасида дипломатик муносабатлар ўрнатилганининг 30 йиллигига тўғри келди. Киевда у Украина президенти Владимир Зеленский билан учрашди. Давлат раҳбарлари, жумладан, мудофаа соҳасида келишув ва меморандумларни имзолади, шунингдек, Украина шарқидаги можарони муҳокама қилди.
Туркияда сўнгги 24 соат ичида коронавирусга чалиниш бўйича 107 мингдан ортиқ янги ҳолат аниқланди. Бу пандемия бошидан бери рекорд кўрсаткич. Мамлакатда жами 12 051 852 киши коронавирус билан касалланган, 88 312 киши инфекция оқибатида вафот этган.
2021 йилнинг январь ойида Эрдўғон коронавирусга қарши эмлангани, унга Хитойнинг Sinovac компаниясига тегишли CoronaVac препарати юборилгани ҳақида хабар қилганди.
Изоҳ (0)