AQShning Shimoliy Koreya bo‘yicha maxsus vakili Son Kim yaqin kunlarda janubiy koreyalik va yaponiyalik hamkasblari bilan yangi aloqalar o‘rnatadi. Bu haqda AQSh davlat kotibining Sharqiy Osiyo va Tinch okeani masalalari bo‘yicha yordamchisi Daniel Kritenbrink jurnalistlarga ma’lum qildi, deb yozadi “TASS”.
Uning so‘zlariga ko‘ra, Shimoliy Koreya muammosi, KXDRning yadroviy va raketa dasturlari tahdidiga qarshi kurashish AQSh, shuningdek, Janubiy Koreya va Yaponiya uchun ustuvor vazifa hisoblanadi.
“O‘ylaymanki, uch tomonlama asosda davom etayotgan hamkorligimiz elchi Son Kim va uning yaponiyalik hamda janubiy koreyalik hamkasblari o‘rtasidagi o‘zaro hamkorlik orqali yaqin kunlarda yanada o‘sishini ko‘rasiz”, — dedi AQSh davlat kotibi yordamchisi.
O‘z navbatida, AQShning BMTdagi doimiy vakili Linda Tomas-Grinfild BMT Xavfsizlik kengashining KXDR bo‘yicha yopiq yig‘ilishi yakunida, Qo‘shma Shtatlar KXDRning hech qanday old shartlarsiz muzokara o‘tkazish taklifini qabul qilishini kutayotganini aytdi.
“Biz KXDRni AQSh va boshqa mamlakatlarning hech qanday old shartlarsiz uchrashish takliflariga ijobiy javob berishga chaqirishda davom etamiz. Biz muloqotga tayyormiz”, — dedi Tomas-Grinfild.
AQSh tegishli shartlar ostida KXDR bilan yuqori darajadagi aloqalar imkoniyatini istisno etmayapti, biroq hozircha Pxenyan birorta muzokaraga qo‘shilgani yo‘q, ta’kidladi Linda Tomas-Grinfild.
Linda Tomas-Grinfildning qayd etishicha, raketa sinovlarini davom ettirayotgan KXDRning harakatlariga eng yaxshi javob sifatida AQSh hozircha faqat bosimni oshirish yo‘lini ko‘rmoqda.
Eslatib o‘tamiz, Shimoliy Koreya yil boshidan buyon ballistik raketalarni faol sinovdan o‘tkazmoqda. Xususan, 30-yanvar kuni mamlakat tezligi tovush tezligidan 16 marta yuqori bo‘lgan o‘rta masofaga mo‘ljallangan ballistik raketani uchirdi.
Izoh (0)