O‘zbekiston Professional futbol ligasi 4-fevral kuni 2021-yilda qilingan ishlar bo‘yicha moliyaviy hisobotni taqdim etdi. Bu haqda “Daryo” muxbiri xabar bermoqda.
Hisobotda liga rahbariyati 2021-yilda qator yo‘nalishlarda qancha xarajat qilingani va tashkilotning yillik daromadlarini ma’lum qildi.
Unga ko‘ra, 2021-yilda tashkilotga kelib tushgan mablag‘ 15 725 200 000 so‘mni tashkil qilgan. Shuning 9 280 000 000 so‘mi homiylar tomonidan jalb qilingan mablag‘ hisoblanadi. Badal pullari — 6 300 000 000, legioner futbolchilar uchun to‘lov — 2 520 000 000, tartib-intizom jarimalari esa 494 500 000 million so‘mni tashkil qilgan.
“PFL tashkil topgan dastlabki yillarida o‘z xarajatlarini to‘liq klublardan olinadigan badal pullari evaziga qoplab kelgan. Ayni vaqtga kelib tashkilot o‘z xarajatlarining qariyb 55 foizini o‘zi ishlab topadi”, — deyiladi tashkilot hisobotida.
Bundan tashqari PFL o‘z tasarrufidagi turli musobaqalarni Eleven Sports portali orqali translyatsiya qilishdan ham 36 ming yevro (440 million so‘m) ishlab olgan.
O‘zPFL bosh direktori vazifasini bajaruvchi Diyor Imomxo‘jayevning so‘zlariga ko‘ra, tashkilot hali badal pullari, homiylar va legionerlar uchun to‘lovdan umumiy hisobda 2 869 300 000 so‘m olmagan (debitor qarzdorlik).
O‘z navbatida O‘zPFL futbol musobaqalarini (Superliga, Pro-Liga, Birinchi Liga, Ayollar Ligasi, turli yosh toifasidagi ligalar va hokazo) o‘tkazish bilan bog‘liq 16 618 788 437 so‘m xarajat qilgan.
Shuningdek, tashkilot qaysi yo‘nalish bo‘yicha qancha mablag‘ sarflanganini ham e’lon qildi.
- Musobaqalar o‘tkazish, tadbirlar uchun va homiylar talabi bilan ishlash — 1 640 043 900 so‘m;
- Taqdirlash marosimi — 710 738 060 so‘m;
- Hakamlar, inspektorlar va komissarlarga to‘langan gonorar miqdori — 5 945 278 000 so‘m;
- Futbolchilarni sug‘urtalash — 554 773 000 so‘m;
- Statistika — 164 017 000 so‘m;
- Futzal — 854 977 025 so‘m;
- Musobaqalar uchun to‘plar — 1 481 000 000 so‘m;
- Jami ishchi-xodimlar uchun: maosh, gonorar, nadbavka, ta’til puli, kompensatsiya, mukofot, ovqatlanish, moddiy yordam, safar xarajatlari va hokazolar — 10 559 781 960 so‘m;
- VAR — 726 626 426 so‘m;
- Translyatsiya uchun — 530 000 000 so‘m;
- Asosiy vositalar — 534 256 050 so‘m;
- Auditor tekshiruv — 720 000 000 so‘m;
- Ijara (O‘zPFL “Bunyodkor” stadionida ijarada turadi) — 260 601 840 so‘m;
- Covid tekshiruvi — 18 560 691 so‘m;
- VAR jihozlari — 53 015 936 so‘m.
Izoh (0)