ПФЛ 2021 йилдаги даромад ва харажатлари бўйича молиявий ҳисобот берди

Ўзбекистон Профессионал футбол лигаси 4 февраль куни 2021 йилда қилинган ишлар бўйича молиявий ҳисоботни тақдим этди. Бу ҳақда «Дарё» мухбири хабар бермоқда.

Ҳисоботда лига раҳбарияти 2021 йилда қатор йўналишларда қанча харажат қилингани ва ташкилотнинг йиллик даромадларини маълум қилди.

Унга кўра, 2021 йилда ташкилотга келиб тушган маблағ 15 725 200 000 сўмни ташкил қилган. Шунинг 9 280 000 000 сўми ҳомийлар томонидан жалб қилинган маблағ ҳисобланади. Бадал пуллари — 6 300 000 000, легионер футболчилар учун тўлов — 2 520 000 000, тартиб-интизом жарималари эса 494 500 000 миллион сўмни ташкил қилган.

«ПФЛ ташкил топган дастлабки йилларида ўз харажатларини тўлиқ клублардан олинадиган бадал пуллари эвазига қоплаб келган. Айни вақтга келиб ташкилот ўз харажатларининг қарийб 55 фоизини ўзи ишлаб топади», — дейилади ташкилот ҳисоботида.

Бундан ташқари ПФЛ ўз тасарруфидаги турли мусобақаларни Eleven Sports портали орқали трансляция қилишдан ҳам 36 минг евро (440 миллион сўм) ишлаб олган.

ЎзПФЛ бош директори вазифасини бажарувчи Диёр Имомхўжаевнинг сўзларига кўра, ташкилот ҳали бадал пуллари, ҳомийлар ва легионерлар учун тўловдан умумий ҳисобда 2 869 300 000 сўм олмаган (дебитор қарздорлик).

Ўз навбатида ЎзПФЛ футбол мусобақаларини (Суперлига, Про-Лига, Биринчи Лига, Аёллар Лигаси, турли ёш тоифасидаги лигалар ва ҳоказо) ўтказиш билан боғлиқ 16 618 788 437 сўм харажат қилган.

Шунингдек, ташкилот қайси йўналиш бўйича қанча маблағ сарфланганини ҳам эълон қилди.

• Мусобақалар ўтказиш, тадбирлар учун ва ҳомийлар талаби билан ишлаш — 1 640 043 900 сўм;
• Тақдирлаш маросими — 710 738 060 сўм;
• Ҳакамлар, инспекторлар ва комиссарларга тўланган гонорар миқдори — 5 945 278 000 сўм;
• Футболчиларни суғурталаш — 554 773 000 сўм;
• Статистика — 164 017 000 сўм;
• Футзал — 854 977 025 сўм;
• Мусобақалар учун тўплар — 1 481 000 000 сўм;
• Жами ишчи-ходимлар учун: маош, гонорар, надбавка, таътил пули, компенсация, мукофот, овқатланиш, моддий ёрдам, сафар харажатлари ва ҳоказолар — 10 559 781 960 сўм;
• VAR — 726 626 426 сўм;
• Трансляция учун — 530 000 000 сўм;
• Асосий воситалар — 534 256 050 сўм;
• Аудитор текширув — 720 000 000 сўм;
• Ижара (ЎзПФЛ «Бунёдкор» стадионида ижарада туради) — 260 601 840 сўм;
• Covid текшируви — 18 560 691 сўм;
• VAR жиҳозлари — 53 015 936 сўм.