АҚШ Давлат котиби Энтони Блинкен АҚШ Беларусь ҳукуматининг «кўп сонли» вакилларига нисбатан виза чекловлари жорий этилаётганини маълум қилди. Вашингтон наздида ушбу фуқаролар «чет элдаги бошқача фикрловчи беларусларнинг таъқиб қилиниши»га алоқадор.
«Давлат департаменти маъмурият ‘Қошиқчи тақиқи’ — трансмиллий репрессияга қарши кураш воситаси (маъмурият 2021 йилда эълон қилган) доирасида Беларусь фуқаролари учун виза чекловларини жорий қилмоқда», — дейилади баёнотда.
Блинкеннинг қўшимча қилишича, айрим Беларусь фуқароларига нисбатан бугунги чоралар «бошқача фикрловчиларга қарши жиддий экстратерриториал ҳаракатлар»га алоқадорлик учун кўрилмоқда.
ОАВ сўровига жавобан Давлат департаменти «бундай маълумотларнинг махфийлигини» билдириб, Вашингтоннинг визага оид санкциялари остида қолган Беларусь вакиллари исмини айтишдан бош тортди. «АҚШ қонунчилигига кўра, виза қайдлари махфий ҳисобланади. Биз ушбу чора қўлланиладиган шахсларни аниқ қилиб кўрсатадиган тафсилотларни бера олмаймиз», — деди Давлат департаменти вакили.
Блинкеннинг баёнотига кўра, Пекин Олимпиадаси бошланишига тўғри келган санкциялар беларуслик спортчиларнинг таъқиб қилиниши учун жавобгарлик чораси сифатида қўлланилмоқда.
Санкция механизми Washington Post журналисти Жамол Қошиқчи хотирасига аталган. У 2018 йилнинг октябрь ойида Туркиянинг Истанбул шаҳридаги Саудия Арабистони консулхонасида ўлдирилган эди.
Изоҳ (0)