Ўзбекистонда бирламчи тиббиёт муассасаларидаги мавжуд 26 турдаги журнал ҳамда 33 турдаги ҳисобот шаклларининг бир қисми амалиётда кераксиз, деган хулосага келинди. Бу ҳақда ССВ матбуот хизмати хабар берди.
2021 йилнинг ноябрь охирларида Соғлиқни сақлаш вазирлигида Тошкент шаҳридаги бир гуруҳ тиббиёт ходимлари билан ўтказилган учрашувда амалиёт учун фойдали бўлмаган, ортиқча оворагарчиликларни келтириб чиқараётган ҳужжат ва ҳисобот шаклларини қайта кўриб чиқиш ҳамда қисқартириш юзасидан мутасаддиларга топшириқлар берилганди.
Шу сабабли амалиёт учун фойдали бўлмаган ҳужжат ва ҳисобот шаклларини қисқартириш юзасидан махсус ишчи гуруҳ тузилган эди. Ўтган қисқа вақт ичида вазирлик томонидан тузилган ишчи гуруҳ бу борадаги вазиятни чуқур ўрганиб, мавжуд 26 турдаги журнал ҳамда 33 турдаги ҳисобот шаклларидан бир қисми амалиётда кераксиз, деган хулосага келган.
Масалан, аҳоли жуда кўп мурожаат қилган паллаларда қабул бўлими ҳамширасининг амбулатор-поликлиника муассасасига келганларни қайд этиш журналини тўлдириши жуда кўп вақт йўқотилишига, оқибатда одамларнинг ҳақли эътирозларига сабаб бўлиб келган. Беморлар қабул бўлимидан рўйхатдан ўтгач, шифокор ҳузурига кириш учун яна рўйхатга ёзилиши зарур эди.
Тиббиёт ходимларининг жароҳат ҳолатларини қайд қилиш журналига эса нохуш вазиятлар юз бермаса, ойлаб, ҳатто йиллаб эҳтиёж бўлмаслиги мумкин. Лекин ҳамшира ана шу ҳужжат турига ҳар куни «Бугун кўнгилсиз ҳолатлар содир бўлмади» деган мазмундаги қайдларни киритиб бориши шарт эди.
Шунингдек, оилавий поликлиниканинг муолажа ҳамшираси ҳар бир беморга «укол» қилгач, буни бир нечта бланкалар, ҳатто махсус журналга ҳам «фалон дона шприц, фалон грамм спирт, фалон грамм пахта ишлатилди» деган маълумотлар билан ёзиб бориши лозим эди. Бу эса бошқа беморларнинг узоқ кутиб қолишига сабаб бўлиб келган.
«Ана шундай нохуш ҳолатларга чек қўйиш мақсадида соғлиқни сақлаш вазирининг тегишли буйруғи қабул қилинди. Унга кўра, шу йил 1 февралдан кўп тармоқли марказий поликлиника, оилавий поликлиника ва оилавий шифокор пунктларида юритиладиган 26 турдаги тиббий ҳисоб журналларидан 14 таси қолдирилди. Қолган 14 тасидан 10 таси соддалаштирилди. 33 турдаги тиббий карта ва бланкалар эса 14 тагача қисқартирилди», — дейилади хабарда.
Аввалроқ президент Шавкат Мирзиёев йиғилишда соғлиқни сақлаш тизими ҳақида гапирар экан, вазир Беҳзод Мусаевга, энг аввало, пастга тушиб ишлаш кераклигини таъкидлаганди.
Изоҳ (0)