Turkiya hukumati lirani qutqarish rejasini yangi bosqichga ko‘tarish harakatida. Ular odamlarni o‘z jamg‘armalarini mahalliy valyutaga aylantirishga chorlamoqda. Bu haqda Bloomberg xabar berdi.
Yakshanba kuni milliy televideniye va ijtimoiy tarmoqlarda namoyish etilgan videomaterialda fuqarolarning mehnati maqtalgan va ulardan jamg‘armalarini valyuta qadrsizlanishidan himoya qiluvchi turk lirasi muddatli depozitlariga sarmoya kiritish so‘ralgan.
Lira so‘nggi yillarda AQSh dollariga nisbatan qadrsizlanayotgan edi. 2021-yil oxiriga kelib esa misli ko‘rilmagan darajaga tushib ketdi.
Prezident Rajab Toyyib Erdo‘g‘on 20-dekabr kuni inqirozni to‘xtatish uchun bir qator chora-tadbirlarni kiritdi va bu oy valyuta kursi nisbatan barqaror bo‘ldi. Markaziy bank lirani o‘z siyosatining markaziga qo‘yishni va uni himoya qilishni va’da qildi.
Turkiya 2018-yilning may oyidan beri eng yuqori oylik savdo kamomadini qayd etdi.
Turkiya davlat statistika instituti ma’lum qilishicha, tafovut o‘tgan yilga nisbatan 49,3 foizga oshib, 6,8 mlrd dollarga yetdi. Yillik kamomad 46,1 mlrd dollarni tashkil etdi, bu o‘tgan yilga nisbatan 7,5 foizga kam.
Dekabr oyida oylik eksport 2020 yilga nisbatan 24,9 foizga oshib, 22,3 mlrd dollarga, import esa xuddi shu davrda 29,9 foizga oshib, 29,1 mlrd dollarga yetgan edi.
Turkiyaning energiya to‘lovi ko‘rsatkichi dekabr oyida 7,17 mlrd dollarni tashkil etib, o‘tgan yilga nisbatan 160,5 foizga o‘sdi. Bu esa Turkiyaning neft va tabiiy gaz narxlarining ko‘tarilishi bilan bog‘liq tashqi nomutanosibliklari uchun xavflarni ko‘rsatmoqda.
Xuddi shu davrda po‘lat va temir importi 84,6 foizga o‘sdi, bu esa tovar narxlarining keng ko‘lamli o‘sishi bilan bog‘liq.
Ta’minotdagi to‘siqlar eksportning ba’zi asosiy tarmoqlarida o‘sishni sekinlashtirdi, masalan, chet elga jo‘natilgan avtomobillar atigi 3,4 foizga o‘sib, 2,59 milliard dollarga yetdi.
Eksport o‘tgan oyda importni bor-yo‘g‘i 76,6 foizga qopladi. Bu bir yil avvalgi ko‘rsatkichga nisbatan 79,7 foizga kam.
Izoh (0)