Туркия ҳукумати лирани қутқариш режасини янги босқичга кўтариш ҳаракатида. Улар одамларни ўз жамғармаларини маҳаллий валютага айлантиришга чорламоқда. Бу ҳақда Bloomberg хабар берди.
Якшанба куни миллий телевидение ва ижтимоий тармоқларда намойиш этилган видеоматериалда фуқароларнинг меҳнати мақталган ва улардан жамғармаларини валюта қадрсизланишидан ҳимоя қилувчи турк лираси муддатли депозитларига сармоя киритиш сўралган.
Лира сўнгги йилларда АҚШ долларига нисбатан қадрсизланаётган эди. 2021 йил охирига келиб эса мисли кўрилмаган даражага тушиб кетди.
Президент Ражаб Тоййиб Эрдўғон 20 декабрь куни инқирозни тўхтатиш учун бир қатор чора-тадбирларни киритди ва бу ой валюта курси нисбатан барқарор бўлди. Марказий банк лирани ўз сиёсатининг марказига қўйишни ва уни ҳимоя қилишни ваъда қилди.
Туркия 2018 йилнинг май ойидан бери энг юқори ойлик савдо камомадини қайд этди.
Туркия давлат статистика институти маълум қилишича, тафовут ўтган йилга нисбатан 49,3 фоизга ошиб, 6,8 млрд долларга етди. Йиллик камомад 46,1 млрд долларни ташкил этди, бу ўтган йилга нисбатан 7,5 фоизга кам.
Декабрь ойида ойлик экспорт 2020 йилга нисбатан 24,9 фоизга ошиб, 22,3 млрд долларга, импорт эса худди шу даврда 29,9 фоизга ошиб, 29,1 млрд долларга етган эди.
Туркиянинг энергия тўлови кўрсаткичи декабрь ойида 7,17 млрд долларни ташкил этиб, ўтган йилга нисбатан 160,5 фоизга ўсди. Бу эса Туркиянинг нефть ва табиий газ нархларининг кўтарилиши билан боғлиқ ташқи номутаносибликлари учун хавфларни кўрсатмоқда.
Худди шу даврда пўлат ва темир импорти 84,6 фоизга ўсди, бу эса товар нархларининг кенг кўламли ўсиши билан боғлиқ.
Таъминотдаги тўсиқлар экспортнинг баъзи асосий тармоқларида ўсишни секинлаштирди, масалан, чет элга жўнатилган автомобиллар атиги 3,4 фоизга ўсиб, 2,59 миллиард долларга етди.
Экспорт ўтган ойда импортни бор-йўғи 76,6 фоизга қоплади. Бу бир йил аввалги кўрсаткичга нисбатан 79,7 фоизга кам.
Изоҳ (0)