Тошкент шаҳар ҳокимлиги ҳузуридаги Рақамли ривожланиш департаменти Age Tashkent лойиҳасини ишга туширди. Бу ҳақда ҳокимлик ахборот хизмати хабар қилди.
Маълум қилинишича, лойиҳа ёрдамида танланган вақт оралиғини ёки аниқ йилни қўллаган ҳолда Тошкентдаги биноларнинг ёшини аниқлаш имконияти мавжуд.
Қурилган йилига қараб барча бинолар турли рангларда белгиланган. Экраннинг ўнг қисмида берилган диапазонда 1944 ва 1998 йиллар оралиғида қурилган биноларни кўрсатиб турувчи «градусник» жойлашган. Қадимгироқ бинолар тўкилувчи материаллар — улар қурилишида қўлланилган сомон ва лой рангида акс эттирилган. Собиқ СССР даврини оловранг ва қизил ранг акс эттирса, 1966 йилдаги ер қимирлашидан кейин пайдо бўлган метро кўк рангда намоён бўлади. Мустақиллик йилларига оч ҳаворанг белги бўлса, янги Ўзбекистон даври яшил рангда бўялган.
Лойиҳадан фойдаланиш бўйича оддий йўриқнома: харитада сизни қизиқтирган бинони топинг, унга босинг ва керакли маълумотларга – қурилиш санаси, бинонинг тури (турар жой биноси, маъмурий бино) ва бошқа маълумотларга эга бўлинг.
Экраннинг чап қисмидаги қулф белгиси Тошкентнинг чегараларини йилидан келиб чиқиб, кўрсатиб бера олади. Унда барча туманлар, шаҳар атрофидаги қалъа девори, 12 та дарвоза, шунингдек, маданий мерос объектларининг археологик ҳамда кўчаларнинг замонавий номлари кўрсатилган.
Age Tashkent — Тошкент шаҳар ҳокимлиги ҳузуридаги Рақамли ривожланиш департаменти ўнлаб мутахассислари ишининг натижаси ҳисобланади.
«Лойиҳа Тошкентнинг бой тарихи, унинг меъморий ва археологик меросини шахсан кўриб, ҳақиқий баҳо бериш имкониятини беради», — дейилади хабарда.
Қурилмалар ёшини визуаллаштириш лойиҳаси Нидерландияда ишлаб чиқилган, сўнгра Европа ва Россияда кенг тарқалган Building Age Maps челленжидан намуна олинган. Ўзбекистон бинолар ёшини кўрсатувчи интерактив харита пайдо бўлган илк Марказий Осиё мамлакати ҳисобланади.
Изоҳ (0)