Buxoro viloyati Kogon tumanida 28-yanvar kuni erkak o‘zidan 10 yosh kichik yigitni urib o‘ldirib qo‘ydi. Bu haqda Tergov departamenti xabar qilmoqda.
Qayd etilishicha, holat shu kuni soat 02:30 larda Kogon tuman Jomard qishlog‘i 71-uy oldidan o‘tgan ichki yo‘lda sodir bo‘lgan. J.J. ismi erkak (1991-yilda tug‘ilgan) I.A. (2001-yilda tug‘ilgan) bilan uchrashib, o‘zaro bo‘lgan kelishmovchiliklar oqibatida janjallashib qolgan. Oqibatda J.J. yigitning bosh va yuz sohalariga qo‘li bilan urib, og‘ir tan jarohati yetkazgan va hodisa joyidan yashiringan.
I.A. olgan tan jarohatlari bilan shifoxonaning jonlantirish bo‘limiga yotqizilgan. Ko‘rsatilgan tibbiy muolajalarga qaramasdan vafot etgan.
Tergov jarayonida aniqlanishicha, jinoyatning kelib chiqishning sababi J.J. bir kun oldin mast holda jabrlanuvchi bilan telefon orqali bir-birini haqorat qilib, so‘ngra yuqorida ko‘rsatilgan manzilda uchrashgan va natijada J.J. jabrlanuvchiga og‘ir tan jarohati yetkazgan.
Holat yuzasidan Jinoyat kodeksining 104-moddasi 3-qismi “g” bandi (qasddan badanga og‘ir shikast yetkazish) bilan jinoyat ishi qo‘zg‘atilib, “qamoqqa olish” tarzidagi ehtiyot chorasi qo‘llanilgan.
Bu turdagi jinoyatlar uchun Jinoyat kodeksining normalariga ko‘ra, 8 yildan 10 yilgacha ozodlikdan mahrum qilish jazosi belgilangan.
Izoh (0)