Australian Open. Rafael Nadal besh yarim soat davom etgan finalda Daniil Medvedevni mag‘lub etib, tarixiy sovrinni qo‘lga kiritdi

Tennis bo‘yicha Australian Open musobaqasining finali 30-yanvar, yakshanba kuni bo‘lib o‘tdi.

“Ulkan toj” turkumiga kiruvchi turnirning hal qiluvchi o‘yinida Rafael Nadal va Daniil Medvedev o‘zaro to‘qnash keldi.

Final 5 soat-u 28 daqiqa davom etdi. Dastlabki setni rossiyalik sportchi osonlik bilan o‘z foydasiga hal qildi (6:2). Ikkinchi set taybrekka qadar yetib bordi va unda ham Medvedevga omad kulib boqdi (7:6).

Keyingi ikki setni ispaniyalik raketkachi 6:4 hisoblari bilan o‘z tomoniga og‘dirdi. Hal qiluvchi beshinchi setda Nadal 7:5 hisobida ustun keldi.

Shu tariqa Nadal ikkinchi marta ushbu musobaqa g‘olibligini qo‘lga kiritdi. Rafa 2009-yilda ham Australian Open’da g‘olib chiqqandi. Bu Nadal uchun “Ulkan toj” turkumidagi musobaqalar doirasidagi 21-sovrin bo‘ldi. Bu borada ispan Rojer Federer va Novak Jokovichni ortda qoldirdi.

Ma’lumot uchun, jahonning ayni vaqtdagi birinchi raqamli tennischisi Novak Jokovich musobaqa boshlanishi arafasida vaksinatsiya bilan bog‘liq mojaro sabab Avstraliyadan deportatsiya qilingandi.