«Реал» ва «Барселона» бой жамоалар билан рақобатлашиш учун клубнинг 49 фоиз улушини сотиши мумкин

«Барселона» ва «Реал Мадрид» клублар эгалик қилиш шаклини ўзгартириш имкониятларини ўрганиб чиқмоқда.

ABC хабарига кўра, улар клубнинг 49 фоиз улушини йирик компаниялар ёки инвестиция фондларига сотиш ғоясига қизиқиб қолган. Испан грандлари миллиардерларга тегишли бўлган ёки «Манчестер Сити» ва «ПСЖ» каби бутун мамлакатлар томонидан қўллаб-қувватланадиган клублар билан рақобатлаша олиш учун бу ғояни илгари сурган.

Қайд этилишча, дастлаб бу ғоя каталонияликлар бош директори Ферран Ревертерга тегишли бўлган ва у клубнинг молиявий муаммоларини шу йўл билан ҳал қил қилишни таклиф этган.

«Реал» президенти Флорентино Пересга ҳам ушбу ғоя манзур келган: унинг фикрича, «қироллик клуби» учун узоқ муддатли истиқболда бундан бошқа йўл йўқ.

Лойиҳа ҳали бошланғич босқичида бўлиб, бунинг учун клуб аъзоларининг розилиги талаб этилади. «Барселона» ҳам, «Реал» ҳам бу режани амалга оширишнинг энг яхши йўли — акцияларни очиқ тарзда сотиш керак деб ҳисоблайди. Клублар бу орқали қимматли қоғозларнинг рус ёки араб олигархлари қўлига тушиб қолмаслигини таъминламоқчи.

Айни пайтда ҳар иккала клуб нотижорат спорт уюшмаси ҳисобланади, унинг барча аъзолар клубга эгалик қилади.