Шимолий Корея Япон денгизи томон қисқа масофага мўлжалланган иккита баллистик ракетани учирди. Бу ҳақда Жанубий Кореянинг Yonhap агентлиги мамлакат ҳарбийларига таяниб, хабар берди.
Бирлашган штаб бошлиқлари қўмитасининг маълум қилишича, ракеталар шарқий қирғоқдаги Хамхин шаҳри атрофидан учирилган. Қўмита ракетанинг учирилишини диққат билан кузатиб бораётганини ва шай ҳолатда эканини билдирган.
Токио эса ўз навбатида, ракеталар Япониянинг эксклюзив иқтисодий зонасидан ташқарига тушганини маълум қилган. Ҳеч қандай зарар қайд этилмаган.
Таъкидлаш керакки, 2022 йил бошидан буён бу КХДРнинг олтинчи маротаба ракета учириши ҳисобланади. Шимолий Корея ўзининг бундан олдинги ракетасини 25 январь куни учирган эди. Жорий йилдаги биринчи ракетаси 5 январь куни, иккинчисини — 11 январда, учинчисини — 14 январда учирган эди. Шунингдек, 17 январь куни ҳам Япон денгизи томон яна бир снаряд учирилган. Kyodo агентлиги маълумотларига кўра, гап баллистик ракеталар ҳақида кетмоқда.
Ракеталарнинг учирилиши фонида АҚШ 13 январь куни КХДРга нисбатан БМТ тармоқлари бўйича янги санкцияларни жорий этиш таклифини билдирганди. Мамлакатнинг БМТдаги доимий вакили Линда Томас-Гринфильднинг сўзларига кўра, Вашингтон ҳар бир ракета учирилиши БМТ Хавфсизлик Кенгаши резолюциясини бузмоқда деб ҳисоблайди.
Шундан сўнг, Шимолий Корея АҚШ Пхеньянга нисбатан янги санкцияларни жорий этгач, «янада кучли ва аниқ жавоб» қайтаришга мажбур бўлиши ҳақида огоҳлантирганди. «Агарда АҚШ шу каби контрфронтал позицияни эгаллашни давом этса, КХДР бунга янада кучли ва аниқ жавоб қайтаришга мажбур бўлади», — дейилади Шимолий Корея ТИВ вакилининг баёнотида.
Изоҳ (0)