NATO bosh kotibi alyans o‘z qo‘shinlarini Ukraina hududiga joylashtirmasligini ma’lum qildi

NATO’ga a’zo davlatlar o‘z qo‘shinlarini Ukrainaga joylashtirmaydi. Bu haqda alyans bosh kotibi Yens Stoltenberg ma’lum qildi.

“NATO jangovar qismlarini Ukrainaga joylashtirmaydi”, — deydi u CNN telekanaliga bergan intervyusida.

Xavfsizlik kafolati bo‘yicha o‘tkazilgan muzokaralar haqida gapirar ekan Stoltenberg blok Rossiya bilan “qurol nazorati, qurolsizlanish, harbiy faoliyatshaffofligi, xavflarni kamaytirish mexanizmlari va Yevropa xavfsizligiga taalluqli boshqa masalalarni” muhokama qilishga tayyorligini ta’kidlagan. Biroq NATO fundamental tamoyillar bo‘yicha murosaga bormasligini qo‘shimcha qilgan.

Alyans bosh kotibining ma’lum qilishicha, Rossiyaning xavfsizlik kafolatlari bo‘yicha takliflariga AQSh bilan parallel ravishda javob yuborishini aytgan.

“Biz NATO’ning takliflari, yozma hujjat bo‘yicha ishni yakunlayapmiz va uni shu hafta oxirida yuboramiz”, — deydi u.

Avvalroq Zelenskiy AQSh davlat kotibi bilan uchrashuvda Ukraina armiyasini modernizatsiya qilishda yordam so‘ragani, Kanada maxsus kuchlarining bir qismi Ukrainaga jo‘natilgani to‘g‘risida xabar berilgandi. Shuningdek, NATO Ukraina yaqinida Rossiya kuchlari to‘planayotgani sabab o‘z qurolli kuchlarini jangovar shay holatga keltirayotgani va Sharqiy Yevropaga qo‘shimcha kema hamda qiruvchi samolyotlarni yuborgani ma’lum bo‘lgandi.