AQSh yirik kompaniyalar — energiya resurslarni ishlab chiqaruvchilar bilan Yevropa Ittifoqiga gaz yetkazib berish masalasini muhokama qilmoqda. Bu haqda prezident Jo Bayden administratsiyasining vakili ma’lum qildi, deb xabar beradi Reuters.
U gap aynan qaysi kompaniyalar haqida ketayotganiga oydinlik kiritmagan, biroq konsultatsiyalar suyultirilgan gaz ishlab chiqaruvchilar bilan ketayotganini ta’kidlagan. “Biz dunyoning turli mintaqalarida — Shimoliy Afrika va Yaqin Sharqdan Osiyo va AQShgacha Rossiyaga tegishli bo‘lmagan qo‘shimcha tabiiy gaz hajmlarini aniqlash ustida ish olib boryapmiz”, — deydi administratsiya vakili.
“Shunga ko‘ra biz dunyodagi yirik gaz ishlab chiqaruvchilar bilan muzokaralar o‘tkazib, ularning tabiiy gaz qazib olish hajmini vaqtincha oshirish va ushbu hajmlarni Yevropadagi xaridorlarga taqsimlash imkoniyatini ko‘rib chiqyapmiz”, — deya qo‘shimcha qiladi u.
Keyinroq Oq uy vakili Jen Psaki AQSh Rossiya gaz yetkazib berishni to‘xtatib qo‘ygan taqdirda Yevropa uchun muqobil gaz manbalarini topish ustida ish olib borayotganini tasdiqlagan. Uning so‘zlariga ko‘ra, Rossiya tomonidan yonilg‘i yetkazib berilishining qisqartirilishi Qo‘shma Shtatlardagi narxlarga minimal bosim ko‘rsatadi.
Eslatib o‘tamiz, yanvar oyi o‘rtalarida Yevropada tabiiy gazning birja narxlari yana ko‘tarilib, ming kub metr uchun 1,1 ming dollardan oshib ketdi. Bungacha, dekabr oyi oxirida yonilg‘i narxi tarixiy maksimum darajaga ko‘tarilgandi (21-dekabrda ming kub metr uchun 2190,4 dollar), undan keyin esa 1000 dollargacha tushgan.
Izoh (0)