Ramzan Qodirov Rossiya prezidenti yoki vazir bo‘lishni istamasligi haqida gapirdi

Checheniston Respublikasining rahbari Ramzan Qodirov o‘zini na Rossiya prezidenti, na vazir va na federal darajadagi biror lavozimda ko‘radi. Bu haqda u Telegram kanalida yozgan.

“Har doim aytganman va yana aytaman, men o‘zimni federal lavozimlarda ko‘rmayman — na prezident, na vazir va hokazo. Mening joyim shu yerda, Checheniston Respublikasida va bu yerdan hech qayoqqa ketmayman!”, — deb yozadi Checheniston rahbari.

Qodirov, shuningdek, Rossiya Ukraina masalasida qanday yo‘l tutishi kerakligi haqida Checheniston rahbari sifatida emas, balki “bloger” va “oddiy odam” nuqta’yi nazaridan gapirganini qo‘shimcha qildi.

“Agar hudud rahbari sifatida nimadir deyishimga to‘g‘ri kelsa, ‘Buni men — Checheniston Respublikasining rahbari Ramzan Qodirov aytyapti’, deyman”, — ta’kidladi u.

Checheniston rahbarining qo‘shimcha qilishicha, u Rossiya o‘z hududining manfaatlarini hamisha himoya qilishiga ishonadi.

Rossiya va Ukraina munosabatlari haqida Qodirov Checheniston parlamenti raisi Magamed Daudov bilan jonli efir chog‘ida gapirgandi. Uning fikricha, Rossiya allaqachon Ukrainani “qo‘shib olishi” va u yerda tartib o‘rnatishi kerak edi, AQShning Ukraina hududida yangi bazani joylashtirish istagi, umuman olganda, ikki davlat o‘rtasidagi munosabatlarning keskinlashishiga olib keldi. Agar Ukraina fuqarolari qarshilik qilmasa, Rossiya buni qilishi kerak, deb hisoblaydi Checheniston rahbari.

“Agar men prezidentning o‘rnida bo‘lganimda, Ukrainani ancha oldin egallab, u yerga qo‘shin jo‘natgan va vaziyatni tartibga solgan bo‘lardim. Agar davlat tepasida aqldan ozgan, korrupsionerlar o‘tirgan bo‘lsa va shu davlat orqali ular bizning mamlakatimiz xavfsizligiga tahdid solsa, jim qarab turishimiz kerakmi?”, — dedi Qodirov.

Rossiya prezidenti matbuot kotibi Dmitriy Peskov Kreml Qodirovning bunday mulohazasiga qanday munosabat bildirishi haqidagi savolga javob berar ekan, mamlakat tashqi siyosatini prezident belgilab berishi, Checheniston rahbari agar istasa, navbatdagi saylovda qatnashishga urinib ko‘rishi mumkinligini ta’kidladi.

“Hozircha davlat rahbari — Vladimir Putin”, — deya qo‘shimcha qilgan Peskov.

Qodirov avval ham Rossiya Ukrainani qo‘shib olishi kerakligini aytgan, keyinroq buni Checheniston rahbari sifatida emas, balki oddiy shaxs sifatida o‘z fikrini bildirayotgani bilan izohlagan.

Eslatib o‘tamiz, Chechenistonda 2021-yilning sentabr oyida bo‘lib o‘tgan respublika rahbari saylovi natijalari bo‘yicha Ramzan Qodirov jahon rekordini o‘rnatgandi — saylovchilarning 99,7 foizi unga ovoz bergan.

Qodirov 2007-yildan buyon Chechenistonni boshqaradi (2011-yil 5 aprelgacha — respublika prezidenti sifatida). Mintaqa rahbari etib tayinlangan vaqtda u 30 yoshda edi.