Буюк Британия ва Норвегия коронавирусга қарши эмланганлар чегарани кесиб ўтгандан сўнг жойлаштириладиган карантин тартибини бекор қилди. Бу ҳақда мамлакатларнинг ҳукуматлари сайтида сўз боради.
11 февралдан бошлаб Британияда мамлакатга келган сайёҳлар ЖССТ томонидан тавсия қилинган дори воситалари билан эмланган бўлса, улардан ПЗР тест топшириш талаб этилмайди. Улар фақатгина эмланиш даражасини белгилаши, сафар тарихи ва алоқа маълумотлар келтириладиган сўровномани тўлдириши керак.
Шу билан бирга, тўлиқ эмланмаганлар, хусусан, умуман эмланмаган ёки ЖССТ томонидан тан олинмаган вакцина билан эмланган одамлар мамлакатга кириши учун камида 48 соат олдин тест топширган бўлиши лозим. 18 ёшгача бўлган сайёҳлар олдингидек чегарада тест топшириши шарт эмас. Таъкидланишича, коронавирус аниқланган тақдирда фуқаро ўзини ўзи яккалаши керак бўлади.
Норвегия эса 26 январдан бошлаб мамлакатга кирувчиларни карантинга олиш тартибини бекор қилишга қарор қилган. Ҳукумат сайтида келтирилишича, гап умуман эмланмаган ёки ЖССТ маъқулламаган дори воситалари орқали вакцинациядан ўтган туристлар ҳақида кетмоқда.
Эндиликда Норвегияга фақат коронавирусга топширилган ПЗР тест ёки экспресс-тестнинг салбий натижаси тўғрисидаги маълумотнома билан кириш мумкин. Мамлакатга келган турист яна битта тест топширади ва унда коронавирус аниқланса, ўзини ўзи яккалаш режимига ўтади.
Бундан ташқари, чегарани кесиб ўтган хорижликлар рўйхатдан ўтиш сўровномасини тўлдириши керак — бу 16 ёшдан катталар учун. Шу билан бирга, Норвегия касалланиш билан боғлиқ вазият ўзгарса ёки вируснинг янги варианти аниқланса, қайта карантин жорий этилиши мумкинлигидан огоҳлантирган.
Аввалроқ Чехияда карантин қоидаларини бузган фуқаро уч йилга қамалиши мумкинлиги, Венгрияда коронавирусга қарши вакцинанинг тўртинчи дозаси билан эмланишга рухсат берилгани, Италияда 50 ёшдан ошганлар учун COVID-19 га қарши мажбурий эмлаш жорий қилингани тўғрисида хабар берилганди.
Изоҳ (0)