Грецияга ёғган кучли қор сабаб «Аттики одос» миллий автотрассасида 5 минг машинанинг ҳаракати тўхтаб қолди, кўплаб ҳайдовчиларнинг қор тузоғига тушганига 12 соатдан ошди, деб хабар беради «РИА Новости».
Маълум қилинишича, автотрассада бир неча километрлик тирбандликлар юзага келган — ёзги шиналар кийгизилган машиналар ҳаракатлана олмаяпти, чунки йўлларни бутунлай қор босган.
Таъкидланишича, Грециянинг айрим туманлари электр энергиясисиз қолган. 25 январь дам олиш куни деб эълон қилинган бўлиб, қатор туманларда боғча ва мактаблар фаолияти тўхтатилган. Фақат озиқ-овқат дўконлари ва дорихоналар ишламоқда. Синоптикларнинг сўзларига кўра, ноқулай об-ҳаво шароити 26 январга қадар давом этади.
Греция ҳукумати 24 январь куни кечқурун «Аттики одос»да қолиб кетган юзлаб машиналарни чиқариб олиш бўйича кенг кўламли операцияларни бошлаган. Ҳайдовчилар ҳаракатини таъминлаш учун ўтказилаётган операциялар ўт ўчириш хизмати, полиция ва қуролли кучлар, шунингдек, кўнгиллилар ёрдамида амалга оширилмоқда.
«Дастлабки уч соат ичида, тахминан, юзта ҳайдовчига ёрдам бердик», — дейилади хабарда. Ҳайдовчиларга егулик ва сув тарқатилмоқда.
«Қор қаттиқ ёғаётгани ва ўнлаб автомобиллар тузоқда қолиб кетгани сабаб армия операцияси жуда мураккаб шароитда ўтказиляпти. Беш мингга яқин ҳайдовчи блоклангани ҳақида маълумотлар бор», — деб ёзади «Прото тема» нашри. Таъкидланишича, вазиятни ёритиб бораётган бир нечта журналист ҳам қорли тузоққа тушиб келган.
Аввалроқ Туркия жанубида рекорд даражадаги қор бўронлари кузатилгани, Тошкент ва Истанбул ўртасидаги авиапарвозлар кучли қор сабаб кечиктирилгани тўғрисида хабар берилганди.
Мавзуга доир: Саудия Арабистонида қор ёғди (фото)
Изоҳ (0)