Surxondaryoda maktab o‘quvchilari orasida jihod va hijrat g‘oyalarini targ‘ib qilgan shaxslarga sud hukmi o‘qildi

Xalqaro terrorizm tarafdorlari uzoq muddatga ozodlikdan mahrum etildi, deb xabar bermoqda O‘zA.

Qayd etilishicha, Davlat xavfsizlik xizmati Surxondaryo viloyati boshqarmasi, viloyat Milliy gvardiya va Ichki ishlar boshqarmasi hamkorlikda tezkor tadbir o‘tkazgan. Unda Termiz shahri hududida joylashgan masjidlar atrofida jihod va hijrat g‘oyalarini targ‘ib qilib, kelgusida Suriya va Falastin davlatlaridagi qurolli to‘qnashuvlarda ishtirok etishni rejalashtirgan shaxslarning jinoiy faoliyatiga chek qo‘yilgan.

Jinoiy guruhning asosiy yetakchilari bo‘lgan G‘.B. va N.T. fuqarolarni, ayniqsa, voyaga yetmagan maktab o‘quvchilarini diniy ekstremizm va terrorizmga faol da’vat qilib kelgan.

Termiz shahrida istiqomat qiluvchi ushbu shaxslar 2021-yilning 15-iyun sanasida qo‘lga olingan. Ularga nisbatan Jinoyat Kodeksining tegishli moddalari bilan jinoyat ishi qo‘zg‘atilib, tergov harakatlari olib borilgan.

G‘.B. Jinoyat kodeksining 159-moddasi 1-qismi (konstitutsiyaviy tuzumiga tajovuz qilish), 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandi, 244-2-moddasi (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) 2-qismi “b” bandi bilan aybdor deb topilib, 15 yil 6 oy muddatga qamalgan. N.T. esa Jinoyat kodeksining 244-2-moddasi 2-qismi “b” bandi bilan aybdor deb topilib, 15 yil muddatga ozodlikdan mahrum etilgan.