O‘zbekistonda 2021-yilda 19 ming 967 ta mehnatni muhofaza qilish to‘g‘risidagi qonunchiligi buzilishi aniqlangan. Bu haqda AOKAda o‘tkazilgan brifingda Bandlik va mehnat munosabatlari vazirligi axborot xizmati rahbari Mavjuda Mirzayeva ma’lum qildi.
Qayd etilishicha, ko‘rsatkich 2020-yilda 11 ming 621 tani tashkil etgan. Holatlar yuzasidan 1970 nafar aybdor shaxsga jami 3 milliard 340 million so‘m jarima qo‘llangan.
Ishlab chiqarish bilan bog‘liq 810 ta baxtsiz holat qayd etilgan. Shundan 54 tasi guruhiy, 558 tasi oqibati og‘ir, 198 tasi o‘lim bilan tugagan baxtsiz hodisalar hisoblanadi. Ishlab chiqarishdagi baxtsiz hodisalar oqibatida 907 kishi jarohatlangan, ulardan 238 nafari halok bo‘lgan, 632 nafari og‘ir tan jarohatini olgan va 37 nafari yengil turdagi jarohatlar olgan.
Tekshirish natijalari bo‘yicha 596 nafar aybdor mansabdor shaxslar jami 1 milliard 380,9 million so‘m jarima qo‘llash tartibi bo‘yicha ma’muriy javobgarlikka tortilgan, 199 nafar mansabdor shaxsga nisbatan jinoiy ish qo‘zg‘atilgan.
Eslatib o‘tamiz, O‘zbekistonda 2020-yilda ishlab chiqarishda 607 ta baxtsiz hodisa sodir bo‘lgan. Oqibatda 693 nafar xodim jabrlangan, shundan 201 nafari halok bo‘lgan.
Izoh (0)