Rossiyada balandlikdan yiqilib, umurtqa pog‘onasidan og‘ir tan jarohati olgan xorazmlik migrant O‘zbekistonga qaytarildi. Bu haqda Tashqi mehnat migratsiyasi agentligi xabar berdi.
Ma’lum qilinishicha, agentlikka Xorazm viloyatida yashovchi K.B. murojaat qilib, Rossiyada vaqtinchalik mehnat faoliyatini amalga oshirish davrida og‘ir tan jarohati olgan turmush o‘rtog‘i B.M.ni O‘zbekistonga qaytarishda amaliy yordam so‘ragan.
Mazkur murojaat arizasi bo‘yicha gentlikning Moskva shahridagi vakolatxonasi xodimlari tomonidan o‘rganish ishlari olib borilganda B.M. 2019-yilning mayida vaqtinchalik mehnat faoliyatini amalga oshirish uchun Rossiyaga ketgani, 2021-yilning noyabrida balandlikdan yiqilib, umurtqa pog‘onasidan og‘ir tan jarohati olgani aniqlangan.
Fuqaro mustaqil harakatlana olmasligi, mehnat qilish qobiliyatini yo‘qotgani va davolanish jarayonini davom ettirish maqsadida O‘zbekistonga qaytishda amaliy yordam so‘ragan.
Fuqaroning pasporti yaroqsiz holga kelib qolgani sabab vakolatxona xodimlarining sa’y-harakatlari natijasida O‘zbekistonning Moskvadagi bosh konsulxonasi tomonidan vatanga qaytish guvohnomasi kommissiya to‘lovlarisiz, qisqa fursatlarda tayyorlab berilgan.
23-yanvar kuni fuqaro B.M. shifokor nazoratida Moskva—Toshkent aviareysi orqali Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan O‘zbekistonga olib kelingan.
Uni Toshkent xalqaro aeroportida Tashqi mehnat migratsiyasi agentligi ma’sul xodimlari va fuqaroning yaqin qarindoshlari kutib olgan va Xorazmga kuzatib qo‘ygan.
Bundan avval Rossiyada baxtsiz hodisa sabab oyog‘idan og‘ir jarohat olgan va sog‘lig‘i keskin yomonlashgani sabab mehnatga layoqatsiz bo‘lib qolgan ikki fuqaro O‘zbekistonga qaytarilgandi.
Izoh (0)